Berdintasun, Justizia eta Gizarte Politiketako sailburu Beatriz Artolazabalek Berrizko Olakueta Etxea bisitatu du gaur. Bertan, iragaitzazko pertsona zaurgarrienak bizi dira, batez ere emakume bakarrak edo beren kargura adingabeak dituztenak.
Suspergintzak kudeatzen duen Eusko Jaurlaritzako zentroan egindako egonaldia aprobetxatu du Artolazabalek Espainiako Gobernuari migratzaileekin zerikusia duten gaien transferentzia eskatzeko. “Migrazio eta Asilo Zuzendaritzak egindako lan-esperientziaren ondoren —ez ziren gure eskumenekoak—, Espainiako Gobernuari berriro erreklamatzeko unea da, burokrazietan ez galtzeko eta migrazioaren arloko eskumena guri helarazteko”, azpimarratu du sailburuak.
Era berean, honako hau ere argudiatu du: “Horrela bakarrik aplikatu ahal izango ditugu gizarte-politikak eta garatu ahal izango ditugu diseinatuta ditugun pertsonentzako proiektuak; esaterako, Babes Komunitarioko proiektuak edo iragaitzazko pertsonei laguntzeko egokitutako babeslekuak”.
“Aitzindariak gara iragaitzazko migratzaileen arretan”, onartu du Artolazabalek, eta, aldi berean, Berrizko, Oñatiko eta Tolosako baliabideak, Irungo mugako “dispositibo sendoa” eta Harrera programako harrera-pisuak aipatu ditu, Gasteiz, Bilbo, Barakaldo, Santurtzi, Irun eta Pasaiako harrera-plazez gain.
Beatriz Artolazabalek Escrivá Ministerioa kudeatzen ari den Atzerritarren Araudiaren aldaketa ere aipatu du, eta Migrazio eta Asilo eta Familia eta Haurtzaroko zuzendaritzek uda baino lehen ekarpenak egin dizkiote.
“Duela zenbait hilabete egin genituen ekarpenak Inklusio, Gizarte Segurantza eta Migrazio Ministerioaren oinarrizko testu batean. Alderdi Sozialistaren eta Podemosen arteko koalizioa onartzeko eskatzen diogu Gobernuari, udaberritik aurrera ez baita mugimendu berririk izan”, esan du.
Artolazabalek zirriborroaren balorazio “oso egokia” nabarmendu du. Horregatik, “ezinbestekotzat” jo du Atzerritarren Erregelamendua onartzea, “gure lurraldeetan bizi diren ehunka gazte lan-munduan sartzeko eta bazterketatik edo egoera irregularretatik urruntzeko”.
Olakueta Etxeara visita
Xabier Legarretaren Migrazio eta Asilo Zuzendaritza Eusko Jaurlaritzak hiru lurraldeetan dituen baliabideetan egiten ari den lanaren barruan sartzen da Berrizko igarotzako pertsona migratzaileen arreta-zentrora egindako bisita.
Beatriz Artolazabal sailburuak Olakueta Etxea bezalako zentroen garrantzia azpimarratu du, «bakarrik bidaiatzen duten emakume askorentzat babesleku delako; beren seme-alabekin bidaiatzen duten emakume askorentzat eta, gainera, familia ugaria diren ama eta aita askorentzat aterpe delako”.
“Ez gaitezen engainatu” esan du Artolazabalek, “bereziki ahulak diren kolektiboak dira”.
Sailburuak babes eta esker oneko hitzak izan ditu Suspergintza eta EDE Fundazioko kideentzat, Olakueta Etxeko kudeatzaileentzat, eta «Gurutze Gorria, CEAR Euskadi, Goiztiri eta Gasteizko Afro Elkartearen konpromisoa» azpimarratu du.
Bestalde, EDE Fundazioko zuzendari Jose Puyok adierazi duenez, «berrizko aldi baterako harrera-zentroan egiten dugun harrera eta laguntza-lana errespetuan oinarritzen da, pertsona guztien duintasuna bermatzean, haien beharrei, emozionalak barne, arreta ematean, eta haien autonomia eta erabakitzeko azken gaitasuna zaintzean».
Puyok, Gorka Ruiz Olakueta Etxeko koordinatzailearekin batera, azpimarratu duenez, «instalazioaren euskarri zerbitzuak gure laneratzeko enpresak egiten ditu; horrela, ikasketa profesionaleko eta gizarteratzeko eta laneratzeko prozesuak sortzen dizkiegu lan-merkatutik kanpo dauden pertsonei».
Artolazabal eta Puyoren hitzaldien ondoren, Gorka Ruizek zentroko instalazioetara egindako bisita batean parte hartu duten pertsonak gidatu ditu.
Gaur egun, 22 pertsona artatzen ari dira Olakueta Etxean; horietako 9 asilo-eskatzaileak dira eta beste 12 zaurgarritasun handiko egoeran daude. Guztira 5 gizon, 7 emakume eta 10 adingabe dira.
