Turismo, Merkataritza eta Kontsumoko sailburu Javier Hurtadok parte hartu du “Donostia Moda Festibala” jaialdiaren eta «Gipuzkoan zehar erosketak» ekintzaren aurkezpenean. Ekintza horren helburua da tokiko kontsumoa sustatzea eta pandemiak galera handiak eragin dizkion merkataritzako azpisektorea —ehungintza— bultzatzea.
Sailburuak gogorarazi ditu Sailak merkataritza-sektoreari laguntzeko abian jarri dituen neurrietako batzuk, hala nola, pandemian zehar ehungintzako merkataritzara bideratutako 10 milioi euroak edo COVID 2020 laguntzak, beste 10 milioi eurorekin.
Gainera, Euskadi Bono Denda berri bat jarri da martxan. Horren bidez 4,7 milioi euro bideratuko dira 2 epetan —urriaren amaieratik abenduaren 5era arte eta 2022ko urtarrilaren 10etik martxoaren 31ra arte— trukatu ahal izango diren bonu berrietara. % 30eko beherapenetan oinarrituko dira, 10 euroko beherapenarekin erositako 30 euro bakoitzeko. Euskadi Bono Denda berri horien berritasuna da pertsona batek truka ditzakeen bonuen kopurua 5era igotzen dela eta 16 urtetik gorakoek erabili ahal izango dituztela.
Gainera, sailburuak azaldu duenez, “testuinguru berri honetan ahalegin gehigarria egin nahi izan dugu merkataritzarako laguntza arruntetan, laguntza horiek premia berrietara egokituz eta baliabide berriak emanez, saltokien tipologia zabaldu ahal izateko. Horrela, adibidez, Merkataritza Establezimenduak Modernizatzeko (MEM) laguntzen aurrekontuan jasotako zuzkidura 2 milioi eurotan handitu dugu, 3,35 milioiraino igoz, zuzenean merkataritzara bideratzen den programa delako, eta merkatarien inbertsio-premietan eragiten duelako.”
Era berean, MEM laguntzen hartzaileak gehitu egin dira merkataritza-jarduerak zabaldu eta hiriko merkataritza-jarduerarekin lotutako zerbitzuak gehitu ondoren, hala nola ile-apaindegiak eta apaindegiak; garbitegiak, tindategiak eta antzeko zerbitzuak; argazki-zerbitzuak; fotokopia-zerbitzuak; markogintza-zerbitzuak eta hainbat motatako konponketa-establezimenduak.
“Donostia Moda Festibala” laguntzearekin eta “Gipuzkoan zehar erosketak” ekintza paraleloarekin —zeinaren epea duela egun batzuk amaitu da— “Turismo, Merkataritza eta Kontsumo Sailak helburu bikoitza bultzatu nahi izan du: alde batetik, Gipuzkoako saltokietan erosketak suspertzea; horretarako, 2.500 euroko saria emango da, aldez aurretik tokiko merkataritzan kontsumitu dutenen artean zozketatuta —kopuru hori erosketa-txarteletan eraldatuko da—. Beste alde batetik, tokiko merkataritzak gure herriei eta hiriei bizia emateko eta hiri- eta gizarte-kohesiorako duen garrantzia azpimarratzea”, esan du sailburuak amaitzeko.
