Azaroaren 5ean eta 6an, Donostiako Bulebarrean, Tokiko Produktuaren Egunaren beste edizio bat egingo da, Ekonomia Bultzatzeko Zinegotzigoak antolatuta, Donostiako Sustapeneko Guztiona Klusterraren bidez, inguruko nekazaritzako elikagaien ekoizpenei balioa emateko.
- Boulevardean, 30 bat salmenta postu bildu
- 4 euroko deskontu txartelak oparituko dituen karpa bat egongo da hilaren 5ean eta 6an
- Katalunia Plazan, ekoizpen ekologikoari buruzko erakusketa bat
- Hiriko ikastetxeetako ikasleek San Martin azokara bisitak egingo dituzte
- Ikastetxeetako menuak eta hoteletako gosariak bertako produktuekin egingo dira
- Bertako Produktuarekiko Konpromisoaren Sariak emango dira
- Gainera, azaroaren 9tik 13ra bitarte, online erosi ahal izango dira eta % 20ko deskontua izango du erositako produktu bakoitzak
Ekonomia Bultzatzeko zinegotziak, Marisol Garmendiak, adierazi duenez, «bertako Produktuaren Egunak aukera ematen du herritarren artean gure inguruko profesionalen nekazaritza elikagaiak nabarmentzeko. Iaz, online soilik egin ahal izan genuen, eta aurten edizio hibridoa hautatu dugu. Erakusketari gehiago izango ditugu, aurrez aurreko jarduerak egun batzuetan bilduko ditugu, «0 kilometro» deritzon produktua lantzen duten sektoreko eragile guztiekin elkarlanean, eta gure udal plataformaren bitartez salduko dugu bertako produktua: www.dssmarketplaza.eus«.
Ekoizleak, elkarteak, merkatuak, enpresak, ikastetxeak eta abar elkarlanean arituko dira, egun hori Donostiarentzat estrategiko bihurtu den sektore baten erakusleiho bihurtzeko. Boulevardean jendeari irekitako karpa izango da gune nagusia; izan ere, merkatu bat hartuko du barne eta 30 erakusketari inguru izango dira han ekoizkinak saltzen: barazkiak, esnea, gazta, gozokiak, edariak, eta beste. Gainera, bertan dastaketak egin eta girotzeko musika egongo da. Ostiralean, azaroak 5, 9:00etatik 20:00etara zabalduko ditu ateak; larunbatean, azaroak 6, berriz, 9:00etatik 15:00etara bitarte.
Eguna osatzeko 4 euroko opari txartelak emango dira, 8 eurotik gorako erosketa eginez gero merkatuan trukatzeko, baita berariaz ekimen honetarako diseinatutako oihalezko poltsa bat ere, karpan bertan emango dena, Donostia Sustapeneko standean.
Gainera, azaroaren 9tik 13ra bitarte bertako produktua online erosten jarraitu ahal izango da, www.dssmarketplaza.eus webgunearen bitartez, eta % 20ko deskontua izango du erositako produktu bakoitzak. Horrez gain, lehen erosketa bada, bisitariek 20 euroko deskontua eskuratu dezakete 30 eurotik gorako erosketa eginik.
