Iñigo Urkullu lehendakariak Coca-Colak Galdakaon duen lantegia bisitatu du gaur goizean, bere 65. urteurrena dela eta. Bertan, Euskadin errotuta dagoen enpresa honek ingurumen- eta gizarte-proiektuekin duen konpromisoa nabarmendu du. “Urteurren honetan Coca-Colaren ibilbidea, konpromisoa eta inbertsioa eskertu nahi dugu, etorkizun berritzaile, jasangarri eta arduratsuago baten alde”, adierazi du.
Iraunkortasunaren ikuspegitik, Lehendakariak nabarmendu du Coca-Colak % 53 murriztu dituela Galdakaoko plantako isurketak, eta uraren ratioa % 37, 2010etik. Halaber, bere hondakinen balorizazio-ehunekoa azpimarratu du, % 98. “Lidergoari esker, klimaren arloan helburu berri bat lortu nahi dugu, eta berotegi-efektuko gasen zero emisio dituen enpresa bihurtu nahi dugu”, gaineratu du.
Gizarte erantzukizun korporatiboaren ikuspegitik, Urkulluk gogorarazi du Coca-Colak Mares Circulares programa bultzatzen duela, ingurumena zaintzearen inguruan sentsibilizatzeko eta ekonomia zirkularreko ereduak bultzatzeko. Mares Circulares-en Euskadi osoko 40 erakundek parte hartzen dute: Udalak, GKEak, ikastetxeak eta tokiko elkarteak.
Bere hitzaldian, Lehendakariak Coca-Colak berrikuntzan egiten duen inbertsioa ere balioan jarri nahi izan du, digitalizazioa balio-katean sartzean erreferentzia delarik. Adibide berriena eraldaketa digitalean inbertitutako 360 milioi euroak dira, produktuak kontsumitzaileei hurbiltzeko modu berriak aztertzeko eta teknologiak bezero eta hornitzaileekin lankidetza bideak bilatzeko dituen abantailak aprobetxatzeko helburuarekin.
«Bultzatzen eta partekatzen ditugun konpromisoak dira, euskal ekonomiaren eraldaketa berdea eta digitala bultzatzen dutelako”, adierazi du Lehendakariak.
Galdakaoko lantegian egindako ekitaldian izan dira, halaber, Unai Rementeria Bizkaiko Ahaldun Nagusia, Bittor Oroz Nekazaritza, Arrantza eta Elikadura Politikako sailburuordea, Iñigo Hernando Galdakaoko alkatea eta Francesc Cosano Coca-Cola Europacific Partners Iberiako zuzendari nagusia.
Galdakaoko Coca-Cola lantegia
1956ko azaroan Galdakaoko lantegian lehenengo Coca-Cola egin zen. 65 urte hauetan konpainia nabarmen hazi da. Gaur egun, Bizkaiko lantegian 300 pertsonak egiten dute lan, eta 220 milioi litro baino gehiago ekoizten ditu urtero, 140 produktu baino gehiagotan ontziratuta, lata, PET eta beira formatu desberdinetan, besteak beste. Coca-Colak 10.362 bezero ditu Euskadin, eta Bizkaiko lantegian ekoitzitako 78 milioi litro saltzen dizkie urtean, eta Euskadiko bi merkataritza-ordezkaritzen bidez banatzen ditu. Gainera, tokiko 232 hornitzaile ditu.
Galdakaoko lantegian, gainera, edariak ekoizteko kontzentratuen biltegi zentrala dago, eta handik Iberiako gainerako lantegietara banatzen da.
