Iñigo Urkullu lehendakariak eta Jan Jambon Flandriako ministro-presidenteak bilera egin dute gaur goizean Ajuria Enea Jauregian, eta Euskadik eta Flandriak betidanik izan dituzten lankidetza-esparruak errepasatu dituzte. Bileraren ondoren, bi presidenteek elkar ulertzeko beste memorandum bat (MoU) sinatu dute, 2015ean sinatu zuten lankidetza-akordioa indartzeko.
Topaketak bi lurraldeek dagoeneko lankidetzan ari diren arloen balantzea egiteko balio izan du (hala nola kultura- eta sormen-industriak, bioteknologia, adimen artifiziala, klima-aldaketa edo turismoa), eta lan-eremu berriak aztertzeko, hala nola digitalizazioa eta zibersegurtasuna, besteak beste. Gainera, pandemiaren egoerari eta etorkizuneko aurreikuspenei buruzko ikuspegia partekatu dute bi presidenteek.
Mahai gainean izan da, halaber, Euskadik eta Flandesek – Eskumen propioak eta ahalmen legegilea baitaukate – Europaren Etorkizunari buruzko Konferentzian beren ahotsa entzunarazteko egin duten apustua. “Flandes eta Euskadi integrazio europarrarekin konprometitutako bi errealitate nazional gara. Europako bokazioarekin bat gatoz eta Europaren etorkizunari buruzko eztabaidetan parte hartzen ari gara” adierazi du lehendakariak.
Bileraren ondoren, Lehendakaritzan beste lankidetza-hitzarmen bat sinatu da (MoU), eta egunotan Etxepare Institutuak antolatutako Learning Tour edo lan-bisita batean parte hartzen ari den Flandesko ordezkaritza bat izan da bertan. 20 bat eragile, artista eta kultur sortzailek osatutako taldea da, eta euskal eragileekin topaketak egingo dituzte, kulturaren hainbat diziplinatan jarduerak bultzatzeko.
Lehendakariarekin izandako bileraz gain, Jambon presidenteak Euskadira egindako bisita ofizialaren agendan hainbat lan-bilera egin dira ekonomia- eta enpresa-eragileekin, eta bilerak egin dira Tecnalia, Azti, Gaia Klusterra eta Euskadiko Energia Klusterreko arduradunekin.
MoU-a
Gaur sinatutako Elkar Ulertzeko Memorandumaren (MoU) arabera, Euskadik eta Flandesek identitate kolektiboaren eta beren historia, kultura eta hizkuntza propioaren zentzu sakona partekatzen dute. Hori dela eta, bien arteko harremanak sakontzeko asmoa adierazi dute, interes komuneko hainbat eremutan lankidetzan aritzeko.
Horrela, dokumentuan, hasiera batean, bi gobernuen arteko lankidetzaren oinarri izango diren 15 arloak jasotzen dira. Besteak beste: digitalizazioa; ingurumena (bereziki ekonomia zirkularrari, klima-aldaketari eta itsas ikerketari dagokienez); garraioak (batez ere portuei, logistikaren garapenari, mugikortasunari eta obra publikoei dagokienez); gizarte-politikak; genero-berdintasuna; turismoa; kultura- eta sormen-industriak; osasuna; eta enplegua eta enplegurako zerbitzu publikoak.
