Osakidetzaren Arabako ESIak, datorren astelehenetik aurrera, azaroaren 22tik aurrera, beste leku batean izango ditu Pediatriako Larrialdiak. Espazio zabala, modernoa eta erabilera anitzekoa da; hobekuntza ekarriko du, bai paziente eta familiartekoei ematen zaien arretan, bai Osakidetzako profesionalen lanean. Zerbitzu hori irekitzea zerbitzu orokorren eraikin berria martxan jartzeko lehen urratsa da; hura laster irekiko da, eta, haren bidez, Osasun Sailak EAEko osasun-egiturak modernizatzearen eta eguneratzearen alde egiten duen apustuari erantzuten zaio.
Arabako ESIaren Pediatriako Larrialdi Zerbitzua astelehen goizean, azaroaren 22an, aldatuko da lekuz, baina, hala ere, denbora-tarte horretan larrialdietako arretak ez du kalterik jasango. Espazio hori zerbitzu orokorren eraikin berria berritzeko eta egokitzeko proiektuaren barruan sartzen da, eta AUO Txagorritxuko -1. solairuan dago, Larrialdi Orokorren Zerbitzuaren ondoan.
Paziente adingabeak espazio berri horretara, eraikin berria martxan jarri arte, COVID-19aren pandemian zehar bezala, AUO Txagorritxuko ate nagusitik sartuko dira; eguneko 24 orduetan egongo da erabilgarri. Harreratik Pediatriako Larrialdien gune berrira lagunduko diete.
EZAUGARRIAK
Kokapen berriak 600 m2-ko azalera izango du; beraz, lehengo espazioa baino handiagoa izango da, ia % 400. COVID-19aren pandemiaren egoerara egokitu da, eta bi zirkuitu bereizi ditu. Box guztiak dira erabilera eta funtzio anitzekoak, eta une bakoitzean dagoen eskarira egokitzeko gaitasuna dute.
Espazio berriak honako hauek ditu:
- 2 itxarongela.
- Boxen eremua: 4 ohe, 4 sehaska, 4 prozedura-aulki eta behaketarako 2 box.
- Egonkortze-gela.
- 4 kontsulta.
- Prozedura-gela, 2 postu.
- Triaje-gela.
- Erizaintzaren kontrola.
- Guardiako medikuentzako gela.
- Pertsonalarentzako officea.
- Garbiketa- eta desinfekzio-gela.
- Paziente eta familiartekoentzako komunak, haurtxoentzako aldagailuarekin.
- Pertsonalarentzako komuna.
Arabako ESIaren Pediatriako Larrialdi berriek hobekuntza handia ekarriko dute lehengo kokapenaren aldean, eta ekipamendu modernoa eta aurreratua dute; gainera, ingurune atseginagoa eta seguruagoa izango dute, bai paziente eta familiartekoentzat, bai gure profesionalentzat.
