Osasun sailburuak dei egin die erakundeei, eragileei eta pertsonei ekitaldiak edo jarduerak antolatzen dituztenean, arauak betetzea eta betearaztea
Pandemiaren bilakaerak okerrera egiten jarraitzen du, eta funtsezkoa da bilakaera geldiaraztea, gehiagora iritsi aurretik. Hala adierazi du Osasun sailburuak Gobernu Kontseiluaren osteko prentsaurrekoan. Atzo argitaratutako erabaki judizialaren ondoren, Eusko Jaurlaritzak berriro eskatuko dio Espainiako Gobernuari egungo egoera geldiarazteko neurriak hartzeko tresna juridikoak sor ditzala, eta Euskadiko Osasun Larrialdia dekretatzea aztertuko du, baldin eta ZIUen okupazioa 50 ohe baino gehiagokoa bada, eta horri gainerako adierazleen joera negatiboa gehitzen bazaio. Horrek Eusko Jaurlaritza gaituko luke prebentzio neurri zorrotzagoak har ditzan, pandemiaren aurkako euskal legearen esparruan.
Bere hitzaldian, Gotzone Sagardui Osasun sailburuak gogorarazi du gaur egun badaudela neurriak, eta erakundeei, eragileei eta pertsonei dei egin die ekitaldiak edo jarduerak antola ditzaten, araua bete eta betearaz dezaten.
LURRALDE ARTEKO KONTSEILUA
Osasun sailburuak gogorarazi eta eskatuko dio Gobernu espainiarrari, bihar Lurralde Arteko Kontseiluaren bileran, egungo egoera geldiarazteko neurriak hartzea ahalbidetuko duten tresna juridikoak sor ditzala, erabaki judizialak eta pandemiaren bilakaera ikusita, bai Euskadin, bai Europako gainerako herrialdeetan.
- Kanpoaldean maskara erabiltzeko betebeharra berreskuratzea.
- COVID ziurtagiriaren erabilera arautzea ekitaldi eta establezimendu zehatzetan.
- Hirugarren dosia emateko prozesua aurreratzea.
- Eta mekanismo guztiak erabiltzea Covid-19aren aurkako txerto pediatrikoaren etorrera bizkortzeko eta arintzeko, EMAk onartu ondoren.
OSASUN-LARRIALDIA
Eusko Jaurlaritzaren ustez, ospitale-presioa, zehazki, zainketa intentsiboetako unitateen okupazioak 50 ohe baino gehiago okupatzen baditu, eta horri gainerako adierazleen joera negatiboa gehitzen bazaio, osasun-larrialdia dekretatzea aztertu beharko da. Horrek Eusko Jaurlaritza gaitzen du prebentziorako neurri zorrotzagoak har ditzan pandemiaren aurkako euskal legearen esparruan.
INDARREAN DAUDEN NEURRIAK
Gaur egun, Euskadin indarrean daude urriaren 6ko eta azaroaren 16ko aginduetan jasotako neurriak. Hauek dira oinarrizko prebentzio-neurriak:
- Eskuen higienea.
- Pilaketak saihestu.
- Espazio itxiak aireztatzea.
- Maskara barruan eta kanpoan erabiltzea.
- Eta txertaketa
