Eusko Jaurlaritzako Prospekzio Soziologikoen Kabineteak 2030 Agendaren ezagutza soziala eta haren helburuei emandako garrantzia ardatz dituen azterlan bat argitaratu du. Landa-lana 2021eko azaroaren 23tik 26ra bitartean egin zen.
2030 Agenda gero eta ezagunagoa da eta, batez ere, ingurumen-helburuekin lotzen da.
Biztanleriaren ia erdiak (%46) entzun du 2030 Agendari buruz hitz egiten. Ezagutza hori nabarmen handitu da 2018az geroztik, orduan %25ek baino ez zuen entzun horri buruz hitz egiten.
Ingurumenarekin zerikusia duten gaiak lotzen dira gehien Agendarekin. 2030 Agendari buruz entzun duten pertsonen artean, %36k ingurumenaren babesarekin lotzen du, %31k klima-aldaketarekin, %16k CO2 emisioak murriztearekin eta %13 energia jasangarriarekin. Beste %20k garapen iraunkorrari buruz hitz egiten du, oro har.
Herritarren iritziaren arabera, 2030 Agenda gehien bultzatzen ari den erakundea Eusko Jaurlaritza da (%52); bigarrenik, Foru Aldundiak (%28) eta, hirugarrenik, Udalak (%20).
Iritziak banatuago daude 2030 Agendaren helburuen nahikotasunari dagokionez: %23k uste du nahikoak direla, %42k dio ez direla nahikoak eta %34k ez daki nahikoak diren edo ez diren esaten.
2030 Agendari ematen zaion garrantziaren erakusgarri da hamar herritarretik ia zazpik uste dutela garapen jasangarriko helburuak lehentasunez irakatsi beharko liratekeela eskoletan (%68), eta hamarretik bik, berriz, nahi izanez gero, irakatsi beharko liratekeela (%24).
Azpimarratu du garrantzi handiagoa ematen zaiela giza eskubideekin eta pobreziaren eta bazterkeriaren aurkako borrokarekin zerikusia duten helburuei.
2030 Agendaren helburu guztiak dira garrantzitsuak herritarrentzat, baina nabarmentzekoak dira giza eskubideen defentsarekin (%65ek gainerakoen gainetik jartzen dute bloke hori) eta pobreziaren eta bazterkeriaren aurkako borrokarekin (%64k) zerikusia duten helburuak.
Gazteen %60k uste du azken urtean munduko egoerak okerrera egin duela pobrezia gainditzeari dagokionez, eta %49k uste du egoerak okerrera egin duela ekonomia iraunkorra eta kalitatezko enplegua lortzeari dagokionez.
Bestalde, zertxobait handiagoa da klima-aldaketaren aurkako borrokak azken urtean hobera egin duela uste dutenen ehunekoa, baina %20 baino ez dira.
Hamar herritarretik ia bederatzik (%87) uste du garrantzitsua dela munduko herrialde guztiek elkarrekin lan egitea 2030 Agendaren helburuak lortzeko.
2030 Agendaren zabalkundea Eusko Jaurlaritzaren jarduera-programaren lehentasunetako bat da
Gaur aurkeztu den Eusko Jaurlaritzako Prospekzio Soziologikoen Kabinetearen azterlanak islatzen duenez, alde batetik, 2030 Agendari buruzko ezagutza soziala nabarmen hazten ari da 2018az geroztik; eta, bestetik, 2030 Agendaren zabalkundeari dagokionez, hobekuntza kuantitatibo eta kualitatiborako tarte zabala dagoela oraindik.
Datu horiek 2030 Agendaren Lehentasunen Euskal Programaren aurreikuspenak berresten dituzte. Programa horren lau jarduera-ardatzetako bat Garapen Jasangarrirako Helburuen esanahia gizartean zabaltzea da, hain zuzen ere.
Horretarako, hainbat jarduera aurreikusten ditu, hala nola Garapen Jasangarrirako Helburuei buruzko informazioa eta zabalkundea emateko urteko kanpaina bat, dibulgazio- eta/edo formakuntza-ekintzak sustatzeko 2030 Agenda Bonuen diru-laguntzen programa, tresna eta baliabide pedagogikoak prestatzeko hezkuntza-lantalde bat sortzea, edo Euskadiko Gazteriaren Kontseiluarekin lankidetzan aritzeko esparru bat.
Dibulgazioa bultzatzeko ekimenen artean, 2030 Agenda prestakuntza-programa nabarmentzen da, 2022an mila pertsona baino gehiagorengana iritsi nahi duena.
Zabalkunde-helburu berarekin, Trantsizio Sozialaren eta 2030 Agendaren Idazkaritza Nagusiak 2022an, 2023an eta 2024an 2030 Agendaren arloko urteko prestakuntza-programa bat bultzatuko du. Programa horrek hiru ildo nagusi izango ditu: 12 orduko prestatzaileentzako prestakuntza-ikastaroak; 6 orduko oinarrizko prestakuntza-ikastaroak; eta prestakuntza sektorialeko ikastaroak ordutegi desberdineko formatutan, beharren arabera.
2022an, helburua da gutxienez mila pertsonak parte hartzea planteatutako eskaintzetako batean. Prestakuntza-programa honen helburua da 2030 Agendaren esanahiari, proiekzioari eta garrantziari buruzko ezagutza handiagoa izatea gizartean, eta ildo horretan lankidetza-esparruak ezartzea instituzio, enpresa eta erakunde sozialekin.
