Bizkaiko Foru Aldundiko Azpiegituretarako eta Lurralde Garapenerako Sailak larrialdi obra bat egin du Trabakuako BI 633 errepidea behin-behinean eta erregulatuta irekitzeko, abenduaren 21eko 12:00etatik aurrera. Jarduketari esker, bypass bat ezarri ahal izan da trafikoa ahalbidetzeko, zehazki abenduaren 10ean euriteen ondoriozko egon zen lur jausiaz geroztik itxita dagoen bideko trafikoa.
Behin-behineko neurria da, semaforoek erregulatutako errei bakar batetik zirkulazioa modu seguruan bermatzeko. Bypassa 115 metro luze da eta galtzada zaharretik gertu egin da, zirkulazioa desbideratze handirik gabe bideratzeko, baina mendi hegalaren lerradurak ez eragiteko bezain urrun, egonkor egon ahal izateko.
Larrialdiko irtenbide hori abian jarri ahal izateko, etenik gabe lan egin zen abenduaren 10ean, ostiralean, gertatu zenetik hura amaitu arte. Denbora tarte horretan zehar, guztiz kendu behar izan da galtzadara jausi zen 2000 m3 inguruko lohia, eta sasiak kendu, lurra zulatu eta sendotu, drainatu, biuhinak instalatu, zorua pintatu eta prestatu behar izan dira, baita zirkulazioa arautuko duten argiztapena eta bi semaforoak instalatzea ere.
Behin bypassa abian jarrita, irristatutako galtzada birjartzeko obrak egin ahal izango dira. Jarduketa horrek pilote bidezko eustormak jartzean datza, mendi hegalaren goiko aldearen egonkortasuna bermatzen denean, errepidea birjartzeko. Lanak martxoaren amaieran amaitzea aurreikusten da.
