- Kultura Garaikidearen Nazioarteko Zentroak Arte, Zientzia, Teknologia eta Gizartearen lan-ildoa indartu du DIPC eta Teknikerren lankidetzarekin, eta Eusko Jaurlaritzaren laguntzarekin.
- Garatutako proiektuen artean instalazio artistiko berria dago, Medialabek bultzatua, Kursaaleko fatxada argiztatuko duena gaurtik urtarrilaren 6ra arte.
2022an Tabakalerak Arte, Zientzia, Teknologia eta Gizartearen (ACTS) aldeko apustua sendotuko du Dream Painter lanaren aurkezpenarekin eta datorren urteko programazioarekin. Ildo programatiko hori 2020ko uztailean jarri zen abian, Medialab Tabakalerako espazioaren irekierarekin, sorkuntza artistikoa, herritarren sorkuntza eta kultura digitala uztartzen dituena.
ACTS lan-ildoak zientzia eta teknologia arloko adituekin garatutako sorkuntza artistikoko proiektuak bultzatzen ditu, eta erronka komunak jorratzen dituzte, hala nola iraunkortasuna edo teknologiak gure eguneroko bizitzetan duen eragina. Baterako ikerketa- eta sorkuntza-prozesuak, artelanean ez ezik, sormenean eta berrikuntzan ere eragin handia du esparru zientifikoan eta teknologikoan, perspektibak irekiz eta arlo teknikotik haratago doazen agertokiak planteatuz. Sortzen diren sorkuntzei esker, gainera, gai horiek ohiko dibulgazio zientifikoa ez bezala partekatu daitezke herritarrekin, eta ezagutza berria sortzen du, errealitatearen beste irakurketa batzuk ematen ditu eta etorkizuneko beste agertoki batzuk planteatzen ditu.
Dream Painter Teknikerrekin batera
2020ko irailean Quadrature artista alemaniarren Supraspectives lehen ekoizpen artistikoa Medialaben DIPCko astrofisikariekin garatutakoa aurkeztu ondoren, gaur 2021ean Teknikerrekin elkarlanean egindako proiektua aurkeztuko da, Varvara & Mar artista bikoteak sortua. Instalazioaren abiapuntua Teknikerrek robotaren eta gizakiaren arteko elkarreraginean konfiantza kontzeptua elkarrekin ikertzea izan zen, eta emaitza Dream Painter da, Adimen Artifizialari esker bisitarien ametsak entzun eta interpretatzen dituen instalazioa, ondoren horien inguruan margolan bat sortzeko.
Lan-prozesua Teknikerren instalazioetan eta Medialab Tabakaleran egin da azken hilabeteotan, jendearen aurrean. Instalazio robotiko interaktiboak hainbat zati ditu: interakzio-estazioa, robot margolaria eta hitz mintzatua mihise gaineko arte bihurtzen duen kodifikazio sortzailea. Obrak hainbat gai garrantzitsu planteatzen ditu: makinek uler al dezakete gure inkontzientea? Zer gertatzen da algoritmoak gai badira gure ametsei zentzua emateko, guk geuk baino hobeto ulertzeko? Ba al dago konfiantza-mugarik gizateriaren eta teknologiaren arteko harremanean?
Tekniker Euskadiko Fabrikazio Aurreratuko Teknologietan espezializatutako ikerketa teknologikoko zentro nagusiak gizakien eta roboten arteko elkarreragin emozionala aztertzeko interesa agertu zuen, elkarlaneko robotikaren inguruko bere lanean ezagutza berriak eskuratzeko, berrikuntza-prozesuak ezartzeko eta bere lana herritarrengana hurbiltzeko. Varvara & Marrek gai horiek lantzeko instalazio batean lan egitea proposatu zuen eta, gaurtik aurrera, jendearen eskura jarriko da Medialaben sarreraren aurrean, Tabakalerako bigarren solairuan. Bere ibilbidean, Varvara & Mar, Varvara Guljajeva eta Mar Caneten, nazioarteko hainbat zentro eta jaialditan erakutsi ditu bere artelanak: MAD New Yorken, FACT Liverpoolen, Santa Mónica Bartzelonan, Barbican eta Victoria and Albert Museum Londresen, Ars Electronica Museum Linzen, ZKM Karlsruhen, etab.
Proiektua Teknikerrekin batera garatu ahal izan da, Eusko Jaurlaritzako Kultura Sailaren laguntza ekonomikoari esker. Ekarpen horren helburua zen esperientzia pilotu bat garatzea artearen eta industriaren arteko lankidetza-ereduei dagokienez, eta Euskadiko kultura-sektorearen eta zientzia- eta teknologia-sarearen arteko lankidetza-potentziala aztertzea.
Informazio gehiago hemen.
