Obra batzuen lehen fasea da, etorkizunean Loiolako Hondakin Uren Araztegiara (HUA), egun ubidera botatzen diren hondakin urak bideratzeko.
Ingurumeneko eta Obra Hidraulikoetako diputatu José Ignacio Asensiok, URA agentziako zuzendari nagusi Antonio Aizek eta Añarbeko Urak sozietateko lehendakari Miren Jaione Hervásek lankidetza-hitzarmen bat sinatu dute gaur goizean, Anoetako (Donostia) ibarbidearen saneamendua hobetzeko. Obren aurrekontua 4.403.888 euro da, eta aurreikusita dago 2023aren bukaerarako amaituta egotea.
Obren bidez, etorkizunean Loiolako HUAra bideratuko dira gaur egun errekara isurtzen diren hondakin-urak, eta Urumea ibaira iristen jarraituko duten euri-uretatik bereiziko dira. Hitzarmena sinatu dutenak bat etorri dira gure ibaietako eta itsasoko uraren kalitatea hobetzen laguntzen duten jarduera horien ingurumen-onurarekin.
Ingurumeneko eta Obra Hidraulikoetako diputatu José Ignacio Asensiok gogorarazi duenez, Departamentuaren helburu nagusia da “ur hornidurako sistemen bermeak indartzea, eta hondakin uren saneamendua osatzea; horrek ingurumen onura handia dakar”. “Egindako inbertsio materialari eta giza inbertsioari esker, gure ibaien osasuna eta gure etxeetako uraren kalitatea askoz hobea da gainerako erkidegoetakoa baino”, adierazi du Asensiok.
Bestalde, Jaione Hervásek beste bi erakundeetako arduradunei eskertu die “Mankomunitatearen udalerri nagusian jarduera hori egiteko laguntza ekonomikoa eta teknikoa eman izana. Horri esker, duela urte batzuetatik hona oso espero izan den proiektua amaitu ahal izango da”.
Azkenik, Antonio Aizek berretsi duenez, “URA obrak esleitzeko prozesuari abenduaren amaieran ekin zion, eta obrak udaberrirako errendimendu osoan egotea espero dugu, 18 hilabete inguruko iraupena izango duten jarduerak dira”. Aiz pozik agertu da isurketa konplexu bati irtenbidea emateagatik, “ez baitziren betetzen ibilgura itzultzen diren uren kalitate-eskakizunak”. Amaitzeko, nabarmendu duenez, “URA erakundetik uraren ziklo integrala hobetzen eta azpiegituraren defizitari aurre egiten jarraituko dugu”.
Saneamendu proiektuaren deskribapena
Anoeta erreka A-8 saihesbidearen Aieteko tunelaren inguruan hasten da, eta Urumean amaitzen da, Realaren zubitik behera. Ibilbide osoan kanalizatuta dago, eta hiru zati ditu: Aie-Velódromo, Anoeta eta Urumeako eremuak. Herri barruko isurketa-urak eta Puio-Lanberri, Errondo, Miramon, Ospitaleak, Ilunbe, Anoeta eta beste gune txiki batzuetako isurketak biltzen ditu. Azken finean, kanal estalia da, eta mota guztietako urak isurtzen ditu.
Anoetako ibarbidea saneatzeko proiektuan kolektore-sare zabal bat eraikitzea aurreikusten da, errekara isurtzen duten hondakin-urak biltzeko, kirol-eremuaren puntu batean biltzeko (Paco Yoldi igerilekuen ondoan) eta Loiolako HUAra eramateko.
Hitzarmenaren xede den lehen fase honetako obrei esker, kolektore orokor berriaren azken tartea egin ahal izango da, eta Loiolako HUArekin duen lotura gauzatu ahal izango da. Bereziki bereziak dira Anoetako saneamendua konpontzeko egin beharreko jarduketen multzoaren barruan. Lanak Anoetako kirol-gunean dagoen putzu batean hasi eta Loiolako HUAren instalazioetan dagoen putzu batean bukatuko dira. Proiektatutako puztu horretan, mikrotunel bat egiten da, armarria itxita duen zulaketa-teknika erabiliz.
Koten arteko aldea dela eta, malda txikian, Zorroagako muinoaren substratu harritsuan sartuko da, eta 1,6 metroko diametroa duen hormigoi armatuzko galeria bat sortuko da. Galeria horren barruan 600 mm-ko diametroa duen saneamendu-hodia egongo da.
Putzuak beharrezkoak dira bai zuloa bera egiteko, bai obra bukatutakoan, galeria eta saneamenduko kolektorea kontrolatu eta mantentzeko. Saneamenduko obren ondorengo faseak burutu ondoren, Anoetako putzu hori kolektoreak eta proiektatutako adarrak biltzeko putzu gisa eratzea aurreikusten da.
Lehenengo faseko obren kostua 4.403.888 milioi eurokoa da, eta hiru erakundeek finantzatuko dute ia zati berdinetan (% 34 URA enpresak; %3 3 Gipuzkoako Foru Aldundiko Ingurumeneko eta Obra Hidraulikoetako Departamentuak eta % 33 Añarbeko Urak). Proiektua Aguas del Añarbe enpresak idatzi du eta URA izanen da obrak eginen dituena.
