“Jokatu, irabazi eta ahalik eta errentarik handiena lortu nahi dugu“. Horrela hasi du Dani Vivianek gaur eskaini duen prentsaurrekoa, ostegun honetan San Mamesen jokatuko den Kopako finalerdiko joaneko partidan Valentzia CFren aurka jokatzeko bi egun falta direnean. Erdiko atzelariak ilusio handia sumatzen du talde zuri-gorrian: “Osteguneko partidaren bila joango gara. Ilusio handia dago aldagelan. Gure asmoa partidaz partida joatea da beti, eta aurrean dugun erronka gustatzen zaigu. Atzo Espanyolen aurka jokatu genuen eta hori zen buruan genuen gauza bakarra. Gaurtik aurrera, topera prestatzen hasiko gara, ahalik eta ondoen jokatzeko”.
Alderdi pertsonalari dagokionez, Vivian pozik dago denboraldi honetan izaten ari den protagonismoarekin eta taldea orain arte lortzen ari den emaitzekin: “Athleticera etorri nintzen lan egiteko, eguneroko bizitzan ikasteko eta dudan guztia emateko asmoz. Oso pozik nago dena nola doan ikusita, lortzen ari garen emaitzekin. Nire ideia bakarra da lehiatzen eta lanean jarraitzea, daukadan guztia Athletic Clubi emateko”.
Kontratu berritzearen sinadurari dagokionez, atzelaria pozik agertu da zurigorri taldean egonaldia 2026ra arte luzatu duelako: “Oso pozik nago. Gogo eta ilusio handiagoz ezin izan dut sinatu. Berrikuntzaren prozesu osoa gustatu zait. Bi aldeek lehenbailehen sinatu nahi genuen, biontzat onena zela uste genuen, eta oso pozik nago horregatik”.
