Idoia Mendia lehendakariorde eta Lan eta Enplegu sailburuak joan den urteko Lan Ikuskaritzaren balantzea aurkeztu du gaur Bilbon. Horri esker, 16.000 kontratu baino gehiago mugagabe bihurtu dira. Gainera, 2022rako abian jarritako kanpainaren berri eman du, Elena Pérez Barredo Laneko sailburuordearekin eta Icíar González Lan Ikuskaritzako zuzendariordearekin batera.
Mendiak nabarmendu du kontratuak bihurtzea baino zerbait gehiago dela. Lan Ikuskaritzaren lanari esker, behin-behinekotasuna izatetik egonkortasuna, ziurtasuna eta segurtasuna izatera igaro diren 16.494 pertsonez ari gara.
Ildo horretan, azpimarratu du anbizio handiagoko prozesua dela, lan-erreformarekin lortu nahi dena, eta hori izan behar dela kalitate handieneko enplegu hori lortzen lagunduko duen legezko pieza, obra-kontratuak desagertuz eta mugagabeak zabalduz, oro har.
Era berean, gogorarazi du zerbitzua indartzen ari dela giza baliabide gehiagorekin, eta langile kopurua handitzen ari dela, bai ikuskatzaileena, bai ikuskatzaileordeena, legegintzaldian zehar, hamar plazatan. Halaber, baliabide gehiago ematen zaizkie ikuskatzaileei, beren lana arinago egin ahal izan dezaten.
Gaineratu duenez, jakin behar da langileek zerbitzu publiko bat dutela beren eskubideak babesteko, eta zerbitzu horrek, Ikuskaritzak alegia, iristen den salaketa bakoitzean jarduten duela, baina baita salaketarik ez dagoenean ere, prebentzioz.
Irekian kontsulta daitekeen balantze osoak adierazten du kontratua eraldatu zaien pertsona gehienak emakumeak direla. Gainera, Ikuskaritzak istripu-tasa eteteko talka-plan bat hasiko du gaur bertan, istripu larri gehien detektatu diren enpresetara berariaz bideratuta.
