Gobernu Kontseiluak Euskadiko Enplegurako Berrikuntza Zentroen sarerako giza baliabideen zuzkidura onartu du gaur. Hamar lanpostu izango dira eta Europar Batasuneko MRR funtsen kargura finantzatuko dira eta Lanbide-Euskal Enplegu Zerbitzu Publikoak kudeatuko ditu.
Idoia Mendia lehendakariorde eta Lan eta Enpleguko sailburuak proposatuta, Jaurlaritzaren Kontseiluak berretsi egin du gaur goizeko bileran aldi baterako programa bat sortzea, Euskal Autonomia Erkidegoan enplegurako orientazio-, ekintzailetza-, laguntza- eta berrikuntza-zentroen jarduera kudeatzeko. Hori egin ahal izateko, beharrezkoa da bitarteko funtzionarioak izendatzea. Zehazki, hamar lanpostu, bost orientatzaile eta administrari bat Gasteizko egoitza nagusirako, eta beste lau orientatzaile-lanpostu Sestaoko egoitzarako.
Euskadiko Enplegurako Berrikuntza Zentroen sarea Europar Batasuneko MRR funtsekin finantzatutako azpiegitura da, eta laneratzea eta kalitatezko enplegua sustatzen dituzten proiektu berritzaileak sustatzea du helburu. Sestaon eta Errenterian azpiegoitzak izango dituen sare horren egoitza nagusia, azken kasu horretan lehentasunezko arreta-guneen funtsek finantzatua, Arabako hiriburuko Elvira Zulueta kaleko etxetzar enblematiko batean egongo da.
Orientazioaren eta ekintzailetzaren arloan autonomia-erkidegoetan lan egiten duten erakundeek arlo horretan proiektu berritzaileak bultzatzeko ahaleginak partekatzeko duten beharrari erantzuten dio. Gainera, Enplegu Sistema Nazionalaren euskarri espezializatu bihurtu nahi du, lan-merkatuaren egungo ahultasun-egoeran. Sareak hogei zentro izango ditu, bat Autonomia Erkidego bakoitzeko, bat Hiri Autonomo bakoitzeko eta bat Estatukoa.
