Beatriz Artolazabalek, Berdintasun, Justizia eta Gizarte Politiketako sailburuak, jakinarazi du Eusko Jaurlaritzak ETArekin lotutako hamar bat presori hirugarren mailan aurrera egiteko baimena eman diela, Tratamendu Batzordeen proposamenak berretsi ondoren, izan ere, “behar bezala arrazoituta zeuden eta banakako espediente bakoitzean oinarrituta zeuden”.
Artolazabalek azalpen hori eman du kontroleko osoko bilkuran eta Voxeko Amaia Martinezek egindako galdera bati erantzunez. Legebiltzarkideak zalantzan jarri zuen “Eusko Jaurlaritzaren plan errealak, larritasun handiko delituak egin dituzten eta gizarteratzeko oinarrizko baldintzak betetzen ez dituztela frogatu duten presoei gradu-progresioak emateko orduan”.
“Martínez andrea, ez onginahirik, ez askatzerik, ez irizpide politikorik”, erantzun dio Voxeko ordezkariari.
Sailburuak azaldu duenez, Eusko Jaurlaritzak espetxeen kudeaketa 2021eko urriaren 1ean bere gain hartu zuenetik, hiru espetxeetako Tratamendu Batzordeek bigarren mailako 330 berrikuspen egin dituzte, horietatik 26 ETArekin lotutako pertsonenak, eta hirugarren mailako 166 aurrerapen gomendatu dira. Azken talde horretan, terrorismo-delituengatik kondenatutako hamar pertsona daude.
“Jakingo duzunez”, bere azalpenarekin jarraitu du Artolazabalek, “Tratamendu Batzordeak arduratzen dira askatasunik gabeko pertsonen aurrerapenak gomendatu edo gaitzesten dituen txostena egiteaz; txosten profesionalak egiten dituzten diziplina anitzeko taldeak dira”.
Puntu horretan, sailburuak espetxeetako funtzionariak aipatu ditu ETAk gehien mehatxzatutako kolektibo bat bezala, eta haien profesionaltasuna defendatu du txostenak egiterakoan. “Irizpide profesionalen arabera lan egin duten pertsonak dira; eskumenak eskualdatu aurretik lan egiten zuten pertsona berberak. Pertsona berdinak, irizpide berdinak”.
Artolazabalek berretsi egin du talde teknikoen eta Tratamendu Batzordeen “zehaztasunean eta profesionaltasunean” duen konfiantza: “Banakako txostenetan, argi eta garbi adierazten da pertsona horiek edozein helburu edo ingurune terrorista utzi eta baztertu dutela, eta birgizarteratzearen aldeko tratamenduan bilakaera izan dutela”.
Hitzaldiaren amaieran, sailburuak hitz batzuk izan ditu biktimentzat. Behere “lehentasuna” eta “leialtasunean oinarritutako konpromiso irmoa” dutenak direla ziurtatu du.
