Gobernu Kontseiluak gaurko bileran, Hezkuntza sailburuak proposatuta, Agindu bat onartu du. Agindu honen bidez, 2022-2023 ikasturtean, Lanbide Heziketako prestakuntza-zikloak ematen dituzten itunpeko ikastetxeetan garatu beharreko berrikuntza eta ekintzailetza-proiektuak egiteko dirulaguntzak deitzen dira. Proiektuok, honako plan hauek jasotzen dituzten ildo estrategikoekin bat etorri beharko dute: Lanbide Heziketako V. Euskal Planarekin; Euskal Hezkuntza Sistemako Digitalizazio Iraunkorreko eta Sistema Adimendunen Planarekin; eta Euskadiko Lanbide Heziketako Trantsizio Berderako, Pertsonen Trebakuntzarako eta ETEen lehiakortasun jasangarrirako Planarekin.
770.000 euroko diru kopuruarekin, deialdi honen xedea da Lanbide Heziketako zentroetan irakasleak erabat edo partzialki liberatzeko dirulaguntzak ematea, hauek berrikuntza aplikatuko eta ekintzailetza proiektuak egin ahal izan ditzaten. Aipaturiko proiektu horiek 2022-2023 ikasturtean gauzatu beharko dira. Proiektuok garatzerakoan jaso den ezagutza hori ikasleengana transferitzea izango da helburua, bai eta Euskadiko gainerako Lanbide Heziketako ikastetxeetara eta enpresetara iristea ere, Enpresa Txiki eta Ertainetara (ETE) bereziki.
Deialdi honen bidez diruz lagun daitezkeen proiektuen artean, lehentasuna izango dute honako gai hauetakoren batekin zerikusia dutenek: Fabrikazio aurreratua; Fabrika digitala eta konektatua; Eraginkortasun energetikoa eta energia garbiak sortzea; Biozientziak eta Bioteknologiak; Ekonomia jasangarria; Ingurune birtualak; 4.0 Osasuna edo Lanbide Heziketako V. Euskal Planaren Estrategiekin, zein gorago aipaturiko beste planetan jasotakoekin lotura nabarmena duten beste gai batzuek.
Euskadiko itunpeko ikastetxe pribatuek eskatu ahal izango dituzte dirulaguntza hauek, baldin eta 2022-2023 ikasturtean erdi eta goi-mailako Lanbide Heziketako prestakuntza-zikloak itunduta badituzte.
Lanbide Heziketa ezinbesteko bidelaguna da enpresentzat profil profesional berriak garatzeko unean, eta ikasleen prestakuntza zein espezializazioa hobetzeko lanean dihardu. Horregatik, deialdi hau bat dator Lanbide Heziketako ikastetxeetan ingurune estrategikoak eta espezializazio-arloak ezartzeko helburuarekin. Ingurune eta arlo horien bidez, ikasleen enplegagarritasuna hobetzen da, eta, gainera, EAEko enpresei lehiakortasun abantailak eskaintzen zaizkie, bereziki ETEei.
