Idoia Mendia lehendakariorde eta Lan eta Enplegu sailburuak Lanbideko plantilla indartzeko plan bat iragarri du, joan den asteazkenean adostutako BGIren transferentziak euskal enplegu-zerbitzu publikoan botila-lepo berririk eragin ez dezan, eta Jarraipen Batzordea laster bilduko dela aurreratu du, Ministeriotik espedienteak nola eskualdatuko diren adosteko.
Ekain Rico legebiltzarkide sozialistak egindako galderari erantzunez, lehendakariordeak berretsi du oso garrantzitsua dela Euskadiko eta Espainiako gobernuek autogobernuarekin eta justizia sozialaren arloko erantzunak ematearekin duten konpromiso politikoa, batez ere pertsona ahulenentzat.
Baina, gaineratu duenez, transferentzia “konplexu” hori ez da agortzen akordio politikoan, eta ez du esan nahi irtenbide guztiak emango dituen «botoi bat» izango denik. Horregatik, Lan eta Enplegu Saila buru-belarri aritu da hori lortzen, baina lanean jarraitzen du gero ere. Horretarako, asteazkenean bertan eskatu zuen, dagozkion aldizkari ofizialetan argitaratu eta hurrengo egunean, Jarraipen Batzordea biltzea, prestazio hori onartuta dutenen eta ebazteke daudenen espedienteak nola eskualdatuko diren erabakitzeko.
Mendiak azaldu duenez, horrek esan nahi du Gizarte Segurantzak bere gain hartuko dituela orain arte onartutako espediente guztiak eta dagokion ordainketa ekainera arte. “Ekainetik aurrera, Lanbidek bere gain hartuko ditu orain dauden eta atzeratuta dauden zenbateko guztien ordainketak, bai hemendik aurrera eskatzen dutenenak, bai aurrekoenak. Eta horren barruan sartzen dira BGI jasotzen dutenak, prestazio hori jasotzeko eskubiderik ez dutenak baina seme-alabengatiko osagarria jasotzeko badutenak; izan ere, abenduan onartutako Legean jasotako berrikuntza da, kudeaketa-gomendioan ez zegoena”, argitu du.
Bien bitartean, Eusko Jaurlaritzaren barruan, Lanbide indartzeko plan bat prestatzen ari da, atzeratutako espediente guztiak arintzen eta dagozkien BGIren zenbatekoak ordaindu ahal izateko berariaz lan egiten duen pertsona-talde baten bitartez. Paraleloki, Lanbideren egiturazko plantilla handitzeko prozesuari ekin diogu. Hau da, ez dugu egungo plantilla kargatuko botila-lepo berriak eragin ditzakeen zeregin berri batekin.
Horrela, Lehendakariordeak ekainean kokatu du Lanbidek prozesu osoaren ardura hartzeko aukera, Lanbidek BGIren ordainketa barne, Diru-sarrerak Bermatzeko eta Gizarteratzeko Euskal Sisteman erabat integratzeko prozesu baten barruan. Prozesu hori hurrengo Legea onartzearekin amaituko da, eta, horretarako, arintasuna eta adostasuna eskatu dizkio Legebiltzarrari.
