Apirila hilabete itxaropentsua da Leyre Monenterentzat. Aurrelariak denboraldi osoa darama berdegunean parte hartu ezinik, eta Ligako azken txanpa honek bere itzulera ekar dezake. Monenteri ebakuntza egin zioten irailean, sorbaldan lesio bat zuelako. 2019ko abenduan, ebakuntza gelatik pasatuz bideratzen saiatu zen baita ere. Artikulazio horrek “gelatina” zirudien, eta, sendatze prozesu luze baten ondoren, zuri-gorria lehiatzeko prest dago berriro. Zoritxarrez, lehoiak ondo daki zer den zelaietatik aldenduta egotea; izan ere, 2017ko urrian belauneko lesio larri bat izan zuen filialarekin, eta horrek ia urte oso bat jokatu gabe egonarazi zion.
2021-2022 honetan, Monentek lehen taldeko fitxa estreinatu du. 16 urte besterik ez zituela egin zuen debuta Joseba Aguirreren aginduetara 2016an, eta ordutik, lesioak gaindituz, lehen taldearekin eta bigarren taldearekin txandakatu du bere parte-hartzea. Harrobiko jokalariak baloi-kolpe bikaina dauka eta aurrelarien atzetik bere joko-ikuspegia oso baliotsua da. Beste urte batean, Leyrek berak dioen bezala, “ikasitakoarekin” motxilan, orain “kamiseta estreinatzea” besterik ez du buruan, denboraldia bukatzeko falta diren bost partidaren batean. Ongi etorri berriro, Monen!
