150 neskato baino gehiagok kirol-jardueraren bidez euren bizi-kalitatea hobetzen dute Villa El Salvadorren (Limako barrutia, Peru), Bizkaiko Foru Aldundiak eta Athletic Club Fundazioak finantzatzen duten Asociación Deporte y Desarrollo Elkartearen VillaGol proiektuari esker.
Villa El Salvadorreko Asociación Deporte y Desarrollo Elkarte hau kirol arloan eta kirolaren bidez haurren eskubideen sustapenean hamabost urte baino gehiago daramatzan erkidego-erakundea da.
Gaur egun emakumezkoen futboleko Athletic Villa taldea du, neskek kirolean parte har dezaten sustatzeko. Hasieran ez zegoen kirola egiten zuen neskarik eta gaur egun 150 neska eta emakume aktibo inguru daude elkartearen egituran. Beste alde batetik, Athletic Villa taldeak adimen-urritasuna duten pertsonez osatutako Genuine talde bat du.
Oro har, VillaGolek futboleko eta areto-futboleko hainbat talde ditu. Gainera, eskola-laguntza bidezko bekak ditu neska jokalarientzat eta, aldi berean, bekak ematen dizkie neska jokalariei entrenatzaile bihur daitezen.
Era berean, futbola lantzen du gatazken prebentziorako eta tokiko sustatzaileekin elkarlanean Villa El Salvadorreko sektore guztietan areto-futboleko zelaiak martxan jartzeko eta mantentzeko jarduten du.
Enplegua, Gizarte Inklusioa eta Berdintasuna Sustatzeko foru diputatuak, bere Foru Sailak finantzatutako Garapenerako Lankidetzako hainbat proiektu bertatik bertara bisitatzeko bidaian bertan egon denak, azaldu du Villa El Salvador «bizi-baldintza oso zailak dituen auzoa dela, muturreko zaurgarritasuna duena».
«Proiektu honek ingurune seguruan bizitzen eta hazten laguntzen die emakumeei. Hemendik gero beka jasotzen duten neskak ateratzen dira; erizaintza ikasi duen neska bat dago, gero entrenatzen aritzen diren beste batzuk. Proiektuak kirolaren eta bizitzaren balioak ematen dizkie, elkartasunezko ikaskuntza. Gainera desgaitasuna duten mutil eta neskekin egiten dute lan. Harritzekoa da elkarteak egiten duen lana, diziplina, arauak eta portaera-moduak nola irakasten dizkieten, eta egoteko, jolasteko eta harremanak izateko leku bat eskaintzen die», azaldu du.
Laespadak topaketa izan du hogei bat jokalarirekin eta Juan Abantorekin, Villa El Salvadorreko Kirol eta Garapeneko presidentearekin.
