Jaurlaritzaren Kontseiluak gaur onartu du Talentu Digitala Sustatzeko VASS Fundazioari dirulaguntza zuzen bat ematea, Lanbide-Euskal Enplegu Zerbitzuan izena emanda dauden 400 langaberi konpetentzia digital aurreratuetan prestakuntza emateko, arlo teknologikoetako lanpostuak eskuratzeko aukera izan dezaten.
Idoia Mendia lehendakariorde eta Lan eta Enpleguko sailburuak proposatuta, erakunde horri 280.000 euro ematea onartu da. Erakunde horren helburu nagusia talentu digitala babestea eta bultzatzea da, eta, horretarako, «Developers from Euskadi» sustatu du, konpetentzia digital aurreratuen kualifikaziorako prestakuntza garatzera bideratutako enplegurako prestakuntza-proiektu esperimental gisa.
Lanbideren bidez, 400 langabe edo lan-egoera ahulean dauden pertsona hautatuko dira, «Programazioaren oinarriak» prestakuntza-programa egiteko. Hirurogei orduko iraupena izango du, eta parte hartzen dutenek gai horretan hastea nahi du. Ez da beharrezkoa aldez aurreko ezagutza teknikoak izatea. Prestakuntza-aldi horren ondoren, hura gainditzen duten lehen 100 pertsonak 600 orduko bigarren fasera igaroko dira, ‘Full Stack Development’ izenekoa, eta horrek programatzaile profesionalaren zereginak betetzeko gaituko ditu, bai web-diseinuaren esparruan, bai aplikazioen eta datu-baseen programazioan eta kudeaketan. Bi programak on-line emango dira, tutore elebidunekin, eta parte-hartzaile bakoitzak aukeratuko du zein hizkuntzatan egin nahi duen.
Ekimen horrek 2030erako Enpleguaren Euskal Estrategian jasotako helburuetako bati erantzuten dio, produkzio-sistemara egokitzen den enplegu erresilientea, eta, pertsonen ezagutza lurralde baten lehiakortasun-aktibo handia dela abiapuntutzat hartuta, ezartzen du enpleguaren euskal politikak modu integralean indartu beharko duela talentuaren aldeko apustua, prestakuntza-dimentsioa areagotuz eta optimizatuz.
Proiektua 2022ko ekainaren 1etik 2023ko azaroaren 15era bitartean gauzatu beharko da.
