Datorren ostiralean, ekainak 10, iritsiko da Barakaldora Elkano Itsas Herria: Elkano Fundazioak, Albaolak eta Donostiako Euskal Itsas Museoak garatutako kultura-ibilbidea da, eta, Barakaldoko Udalarekin elkarlanean, itsasoarekiko harremana berreskuratzea du helburu, Euskal Herri osoak partekatutako itsas historiaren bidez, Elkanoren Munduko Lehen Bira, aitzakiatzat hartuta.
Juanita Larando patatxea – Albaolako Ikaskuntza erriberako arotzeria-eskolan eraiki den XVIII. mendeko bela-arraunez propultsatutako patatxe baten erreplika – joan den maiatzaren 26an hasi zen zeharkaldia, Pasaia Itsas Festibalaren esparruan. Irailaren erdira aldera arte, itsas zeharbide bat egingo du, eta Bizkaia, Gipuzkoa eta Lapurdiko hogei herri baino gehiagotan ainguratuko da.
Patatxearen bisitaldietan, udalerri bakoitzeko plaza eta portuetan hainbat jarduera egiten dira, itsasoari lotutako kultura bat – euskal kostaldeko herrien ondare komuna – ardatz hartuta,.
«Nondik gatozen eta euskal itsasertzeko udalerriekin ditugun lotura estuak gogoratzen dizkigun itsas kulturako kargamentuaz iritsiko da Elkano Itsas Herria Barakaldora, eta bizirik iraunaraztera gonbidatzen gaitu. Inguruko hainbat herrik bezala, Barakaldok ere garapen sozial, kultural eta ekonomikoa izan du, kasu honetan itsasadarrari begira. Orain, inoiz baino gehiago, elementu horri balioa ematen ari gara, bizitzen ari garen bigarren gizarte- eta hiri-eraldaketa handiari esker. Ekimen honen bidez, ondare hori ezagutarazi, zabaldu eta ospatu nahi dugu, bai eta, horrez gain, lehen munduari egindako itzuliarekin dugun lotura gogorarazi ere, Barakaldoko seme kuttun Juan de Zubileta jaunak hartan parte hartu baitzuen», adierazi du Nerea Cantero Kultura, Hezkuntza, Euskara eta Gazteria arloko zinegotziak.
Juanita Larando ostiralean iritsiko da, 13: 30ean, eta Porturen dartsenan egongo da igandera arte, Bilborako ibilbideari berriro ekiten dion arte. Egun horietan, herriko herritarrek parte hartu ahal izango dute itsasontzia iritsi dela-eta antolatu diren kultura-jardueretan.
KULTUR PROGRAZIOA
Jarduera horiek Porturen dartsenan bertan egin ahal izango dira, gasolinoaren inguruan. Horien artean, hainbat gai-multzoz osatutako erakusketa ibiltaria nabarmentzen da, itsas kulturak euskal gizartearen garapenean eta Barakaldon izan duen garrantzia nabarmenduz. Erakusketa horrekin batera, hainbat jarduera egingo dira itsasoari, nabigazioari, munduari egindako lehen itzuliari, ontzigintzaren ezagutzari eta itsas historiari buruz.
Gainera, ontzia dartsenan bertan egongo da, argazkiak egiteko edo herritarrek ikusteko. Larunbat arratsaldean, 17: 00ak aldera, haurrentzako Elkarrekin Elkano euskarazko ipuin-kontaketa bat antolatu da, Ixabel Agirresarobe eta Iñaki Martiarena Martinen eskutik. Igandean, 12: 00etan, haurrentzako astronomia tailerra egingo da euskaraz, Aranzadi Zientzia Elkarteko astronomia ataleko Virginia Garcíak emana. 15: 00ak aldera, itsasontzia Bilborantz abiatuko da.
ELKANO ITSAS HERRIAREN IBILBIDEA
Maiatzaren 26an hasi zen Elkano itsas Herriaren Pasaia Itsas Festibalean. Ekainean, Bizkaian barrena mugituko da. Hamar bat herri bisitatzen ari da, besteak beste, Zierbena, Ondarroa, Bilbo, Portugalete – fundatu zeneko 700. urteurrena ospatzeko – Elantxobe edo Lekeitio. Uztailean Gipuzkoara itzuliko da, eta Mutrikura sartzean, besteak beste, Deba-Itziar, Zumaia eta Orio bisitatuko ditu, ondoren, Hondarribirantz jarraitzeko. Uztailaren amaieran Urmuga elkartearekin eta EuskarAbentura espedizioarekin bat egingo du Txingudin, eta Lapurdin sartuko da, Ascain barruko porturaino.
Atseden txiki baten ondoren, abuztuan Gipuzkoako kostaldearen eta Lapurdikoaren artean jarraituko du, eta aurretik bisitatu gabeko herrietara iritsiko da. Azkenik, irailean, Getariara itzuliko da, Elkano eguneko programazio bereziaren karitara. Hortik aurrera, Donostiatik Euskal Jaietara igaro ondoren, ibilbideak azken zati bat izango du, eta Ziburu-Donibane Lohitzunera itzuliko da, Ondareari buruzko Europako Jardunaldietarako.
