Lanbideren Administrazio Kontseiluak, Idoia Mendia Lehendakariorde eta Lan eta Enpleguko sailburua buru dela, ekintzaileei laguntzeko, lanean ari diren langileak eta langabeak prestatzeko eta ikertzaile gazteak kontratatzeko hainbat ekimen onartu ditu gaur; guztira, 105,9 milioi euro.
Onartutako lehen deialdia langabetuen 2022tik 2024ra bitarteko prestakuntza-eskaintza finantzatzeko diru-laguntzei buruzkoa da. 65,9 milioi euroko zuzkidura du, eta hartzaileak, batez ere, langabetuak eta Lanbide-Euskal Enplegu Zerbitzu Publikoan eskatzaile gisa edo Gazte Bermea Sistema Nazionalaren Fitxategian izena emanda daudenak dira. Era berean, autonomiako beste enplegu-zerbitzu batzuetan izena emanda dauden langabeek ere parte hartu ahal izango dute, eta, lehentasunik gabe, landunek, betiere guztizkoaren % 30 gainditu gabe. Deialdi hau langabeentzako prestakuntza-eskaintzaren deialdi nagusia da, eta Eusko Jaurlaritzaren mendekoak ez diren erakunde pribatuekin edo publikoekin egin behar da.
Era berean, langile landunen prestakuntza-eskaintza finantzatzeko deialdia berretsi da 2022tik 2024rako urteetarako ere. 29,8 milioi euroko zuzkidura izango du, eta EAEko langile guztiek, mendetasun-egoeran dauden pertsonen zaintzaile profesionalek, administrazio publikoen zerbitzura dauden langileek, guztizkoaren % 10eko gehieneko mugarekin, eta prestakuntza-plan horien erakunde titularretako langileek parte hartu ahal izango dute, guztizkoaren % 10eko mugarekin. Era berean, Lanbiden eskatzaile gisa, beste Enplegu Zerbitzu Publiko batean edo Gazte Bermearen Fitxategian izena emanda dauden langabeek ere parte hartu ahal izango dute.
Onartutako beste programetako bat ekintzaileei laguntzeko laguntzen deialdia da. Horretarako, Lanbidek 3,7 milioi euro bideratuko ditu aurten lau ildoren bidez: enpresa-ideia bat garatzeko, proiektu berriak abian jartzeko, proiektua ezartzeko eta enpresa-jarduera bat sendotzeko laguntzak. Deialdi honetan toki-erakundeen lankidetza aurreikusten da, ekintzaileei laguntza eta tutoretza emateko.
Bestalde, onartu da 6,5 milioi euro gehitzea joan den abenduan gaitutako partidari, 9,7 milioirekin, EBko Berreskuratze, Eraldaketa eta Erresilientzia Planaren esparruan Ikerketa Programa finantzatzeko. Deialdi honek 16 eta 30 urte bitarteko ikertzaile gazteak, teknologoak, teknikariak eta I+G+Bko beste profil profesional batzuk kontratatzea aurreikusten du, baita ikerketarako eta ezagutzaren hedapenerako erakunde publikoetan, unibertsitate publikoetan, zentro teknologikoetan, parke zientifiko eta teknologikoetan, irabazi asmorik gabeko erakunde publiko eta pribatuetan, fundazio gisa, ikerkuntzan eta berrikuntzan inbertitzen duten enpresekin batera ere. Laguntzen xede diren jarduerak arlo hauetan garatuko dira: osasuna, trantsizio ekologikoa eta ekonomia berdea, zerbitzuen digitalizazioa eta datuen ingeniaritza, bai eta gizarte-, kultura- eta arte-arloetarako edo beste edozein ikerketa-proiektuak ere.
Era berean, Administrazio Kontseiluak argi berdea eman dio plantilla indartzeko programaren bigarren faseari, Bizitzeko Gutxieneko Diru-sarreraren espedienteen izapidetzea arintzeko, joan den martxoaren 16an sinatutako eta apirilaren 1ean bere gain hartutako transferentziaren ondoren.
Hil honen amaieran, administrazio-profileko 20 pertsona eta Enpleguko eta Enplegurako Prestakuntzako 4 pertsona sartuko dira aldi baterako, eta horiek joan den maiatzean sartutako 20 administrariei, Enplegu eta Prestakuntzako 4 teknikariri eta 3 aholkulari juridikori batuko zaizkie. Lehendakariordeak martxoaren 22an Legebiltzarrean iragarri zuen bezala, eskumen berriak bere gain hartzeak Lanbideri eskatzen dio eskaera berrien sarrera-fluxua kudeatzea, transferentziaren aurretik metatuta zeuden izapidetu gabeko guztiak kudeatzea, eta Gizarte Segurantzako Institutu Nazionalak eskualdatutako espediente aktiboak kudeatzea. Indartze-programak bi urteko iraupena izango du, eta beste urtebetez luzatu ahal izango da.
Gainera, Gasteizko eta Sestaoko Enplegurako Orientazio, Ekintzailetza, Laguntza eta Berrikuntza Zentroen jarduera kudeatzeko unean uneko zereginetarako bi zerbitzu-batzorde onartu dira. Bi zentro horiek, Oarsoaldean dagoenarekin batera, Europar Batasuneko MRR funtsek finantzatzen dituzte, eta laneratzea eta kalitatezko enplegua sustatzen duten proiektu berritzaileak sustatu nahi dituzte.
