Astebete geratzen da oraindik auzoetako partaidetzazko aurrekontuetan parte hartzeko, baina joan den ostiralera arte, Barakaldoko Udalak dagoeneko 2.496 boto jaso zituen auzotarren aldetik. Igandean, hilak 19, amaituko da joan den ekainaren 6an abian jarri zen proiektua parte hartzeko aukera. «Boto asko jaso dugu online, baina asko eta asko ari dira hautestontzietara hurbiltzen, bere iritzia ematera. Oso pozik gaude parte-hartzearekin», azaldu du Gobernu irekia, Turismoa eta Berrikuntza arloko zinegotzi Gorka Zubiaurrek.
Zehazki, bozketaren lehen bost egunetan 1.313 boto jaso ziren online; 453, berriz, auzoetan dabiltzan karpetan, eta 730, postontzien bidez.
Auzotarrek nahien dituzten hiruna proposamen aukeratuko dituzte beren auzorako. Ez badira hiru aukeratzen, botoak ez du baliorik izango. Bi modutara eman daiteke botoa: online eta aurrez aurre. Lehenengoa aukeratuz gero, www.barakaldo.eus udal-webgunera edo BarakaldoAPP doako aplikaziora jo behar da, eta han oso modu errazean osa daiteke bozketa.
Nahiago dutenek aurrez aurreko aukera partaidetza-orria bete ahal izango dute auzoetako postontzietan, auzoetako karpa ibiltarietan eta adinekoentzako bederatzi udal-zentroetan.
3 MILIOI INBERTSIO INGURU AUZOETARAKO
Barakaldoko Udalak partaidetzazko aurrekontuen inbertsioa handitu du, hasierako 600.000 euroetatik 2,8 milioi euroetara igoz. Horrela, herritarrek hautatutako proposamenak gauzatu ahal izango dira. Parte-hartze prozesu honen lehen fasean auzotarrek parte-hartze handia izan zuten obra-proiektu txikiak aurkeztean, eta horren ondorioz, Udalak partida hori handitu zuen, maila altuko erantzuna eman ahal izateko eta proiektu gehienak gauzatu ahal izateko.
Aurreikuspenen arabera, auzo bakoitzeko proposamen bozkatuenen % 25 gauzatuko da, eta ia 60 proiektu egingo dira hiri osoan.
