Atzo arratsaldetik erabilgarri eta herritarren gozagarri da Izarraitz Ateako skate parkea. Irekierara skatea gustuko duten haur, gazte eta nerabe ugari joan ziren eta aukera izan zuten lehen momentutik beren zaletasunaz gozatzeko grina agertu zuten. Urtearen hasieran hasi zituzten obrak, eta ordutik zain izan dira obrak noiz bukatuko. Atzotik parke berrian ibiltzeko aukera izango dute. Atzokoan, zaletaz gain, parkea nola gelditu den ikusi eta irekiera egiteko Mikel Odriozola Festa batzordeburua, Egoitz Arruti Kiroletakoa eta Ainara Larrañaga Gazteriako elkartu ziren parkean Iñigo Garcia skate zalearekin eta beste hamarnaka zalerekin.
Odriozolak azaldu zuen gisan, hasieran skate parkeko erabiltzaileen eskaerei erantzuteko helburuz, Sanjuandegiko parkea berritzeko proiektua egin zuten, baina «gaur egungo modalitateetarako hura ez da egokia». Hori horrela, eta gazteriatik nerabeen artean egindako parte hartze prozesuan skate park baten adierazi zutela ikusirik, skate park berria egitea erabaki zuen Udalak: «Parkea diseinatzen hasi ginenetetik skate zaleekin harreman zuzena izan dugu. Azkenean beraien nahietara egindako parkea izan da; beraiek baitira ulertzen dutenak», adierazi du. Parke berria eta erakargarria egin dute: «Azpeitikoa Euskal Herriko skate parken artean erreferentea izatea nahi dugu. Skate parke handi bat egin dugu, herrian afizioa badagoela ikusi baitugu». «Elkargune» ere izango da: «Belaunaldi desberdinetako zaleak elkartzeko gunea izango da, eta erabiltzaileek bertako arauak errespetatzea eta zaintzea espero dugu».
Garcia ere gustura azaldu da parkearekin: «Parkeak modalitate desberdinetako kirolak praktikatzeko aukera eskaintzen du. Oso parke ederra geratu da, eta aurrera begira txapelketak egiteko aukera ere eskainiko du». Bide horretan, oso eskertuta azaldu da udalarekin: «Benetan oso gustura eta oso eskertuta gaude parke berri honekin. Izugarria geratu da». azaldu du.
Uztailaren 9an, skate festa
Atzotik irekita bada ere, skate parkearen inaugurazio eguna ere jarri dute: uztailaren 9a. Egun horretan, goizetik gauera arteko festa antolatzen ari dira. Haurrentzako tailerrekin hasiko dute eguna eta musikaz ere girotuko dute egun osoa. Tailerraren ostean, parkearen ondoan jarriko dituzten paneletan grafitigileak muralak egingo dituzte. Eguerdian, elkarrekin bazkaltzeko tartea hartuko dute eta arratsaldean, skate erakustaldia izango da.
Skate munduan ezagunak eta puntan dabiltzan kirolariak izango direla Azpeitian aurreratu dute: Dani Leon eta Sergio Layos, Ian Porciano eta Larrun Barrenetxea izango dira besteak beste. Teresa Williams, agian, etorriko dela adierazi dute. Egunari bukaera emateko, parrillada egingo dute bertan eta gauean Ugalde DJak emanaldia eskainiko du.
