Euskadiko Osasuneko sailburu Gotzone Sagarduik eta Galiziako Sanidade Kontseilari Julio García Comesañak manifestu ireki bat sinatu dute Lehen Mailako Arreta indartzeko. Ministeriora bidali dute eta uztailaren 6ko Lurralde arteko Kontseiluan aurkeztuko dute. Bertan esaten denez, Lehen Mailako Arretako Ekintza Planaz harago, autonomia-erkidegoetako osasun-zerbitzu guztiek dituzten espezialisten defizita dela eta, «premiazko txoke-neurriak» behar dira, Ministerioaren mende soilik dauden espezialistak prestatzeko eskumenen barruan.
Dokumentuan Osasun Ministerioaren eskumenekoak diren sei neurri planteatzen dira, besteak beste, MIR plazak hutsik ez uztea, familiako eta komunitateko medikuntzako profesionalen lekualdaketa saihesteko beste espezialitate batzuk sortzea, prestakuntza espezializatuko plazen kopurua handitzea, aparteko prestakuntza-plan bat edo etorkizuneko plangintza zorrotz bat egitea.
Ministerioaren beraren txostenen aurreikuspenetan oinarrituta, manifestuak planteatzen du familia-medikuntzako espezialisten defizitaren egoera larriagotu egingo dela datozen urteetarako aurreikusitako erretiro-kopuru handiarekin, eta hori konpentsatzeko modu bakarra espezialitate horretako 1.000 prestakuntza-plaza gehiago sartzea dela hurrengo urteetako urteko deialdietan.
«Une honetan, osasunean ez dago arazo larriagorik, ezta premia larriagorik ere. Horregatik, konpromiso bateratua hartu behar dugu egoera hori konpontzeko giltza duten Estatuaren eskumeneko neurriak ahalik eta adostasun handienarekin aurrera ateratzeko. »
Euskadik eta Galiziak «egoera konpontzeko giltza duten Estatuaren eskumeneko neurriak ahalik eta adostasun handienarekin aurrera ateratzeko konpromiso bateratua» eskatu diete gainerako autonomia-erkidegoei eta Ministerioari.
