Ertzaintzak joan den ostiralean Pasaiako hondartzako harkaitzetan erori eta min hartu zuen 35 urteko gizon bat erreskatatu zuen.
Istripua arratsaldeko seiak eta laurden aldera gertatu zen. Partikular batek deitu zuen Euskadiko Larrialdietako Zerbitzura laguntza eskatuz, Pasaiako itsasertzeko harkaitzetan erori zela eta laguntza behar zuela esanez.
Lekura Errenteriako Ertzain-etxeko patruilak, Osakidetzako osasun-langileak eta Gipuzkoako suhiltzaileak hurbildu ziren, Ertzaintzaren helikopteroak eta mendiko atalak lagunduta, eta hauek eman zioten lehenengo laguntza zaurituari.
Azkenean, helikopteroak eraman zuen zauritua, 35 urteko gizona, leku seguru batera, eta bertan zain zuen anbulantziak eraman zuen gero Donostia Ospitalera, saihetsen bat hautsita izan baitzezakeen.
