Lurralde Kohesiorako Departamentuak, Toki Administrazioko eta Despopulazioko Zuzendaritza Nagusiaren bitartez, 150.000 euro inbertitu ditu Aurtitzko errekan ur-bilketa hobetzeko. Lanak Toki Azpiegituren Planaren barruan daude, eta guztira 189.190,89 euroko inbertsioa egin da, Malerrekako Mankomunitateak osatu duena.
Toki Administrazioko eta Despopulazioko zuzendari nagusia den Jesus Mari Rodriguez, Jon Telletxea Malerreka Mankomunitateko lehendakaria; eta Ane Otxandorena, Elgorriagako alkatea; Francisco Javier Bereau Iturengoa; Leire Ortuoste Doneztebekoa; Amets Inda Sunbillakoa; eta Ernesto Domínguez, Zubietakoa izan dira gunea bisitatzen.
Gogoan izan behar dugu Toki Inbertsioen Plana lankidetza erreminta bat dela Nafarroako Gobernua eta toki entitateen artean komunitateko udalerrietan eta kontzejuetan azpiegiturak garatzeko; aldi berean ahalbidetzen digu, herritarrek kalitatezko zerbitzu egokiak izatekotan, oinarrizko ekipamenduen hobekuntzan, garapenean eta sustapenean aurrera egitea, haien bizilekua edozein dela ere.
Jarduketaren xehetasunak
Aurreikusitako jarduketen artean, goiko uretan eginiko ur-bilketa ezeztatzea, ur-bilketarako kutxatila berria eraikitzea; presa txiki berri bat eratzea edo konporta bat birkokatzea; ibilguaren harri-lubetako paretak berreraikitzea; eta Auritzeko errekaren jarduketarako sarbidearen egokitzapena kontenplatzen dira.
Aurreikusten da halaber Zubietako ur-bilketen hoditeria berritzea; Zubietako ur bilketetako ura Auritzeko ponpaketa-gunera hoditeriaren bidez daraman karga-hausturako kutxatila lekualdatuz, hedatuz eta hobetuz; Auritzeko ponpaketa-kasetan emari-neurgailu berri bat instalatzea; hobekuntza jarduketak Ezkurra Ibaiaren bilketan, Aurtitzeko ponpaketa-gunearen alboan; eta Ezkurra Ibaiaren ur-bilketarako isurbide-kutxatila berri bat eraikitzea, besteak beste.
Lanak osatzeko, sareto bat jarriko da ibaiaren bilketa-kutxatilan; konponketak egingo dira Ezkurra ibaiaren alboko bilketa-kutxatilan; eta ibaiaren bilketarako kutxatilaren alboan dagoen harri-lubetaren pareta berreraiki egingo da.
