Nafarroako Gobernuak, gaurko saioan, 1.434.762 euroko kreditua handitzeko baimena eman du, Haur Hezkuntzako lehen zikloko ikasleak eskolatzeko Nafarroako udalekin sinatutako hitzarmenak finantzatzeko.
Neurri honekin, Exekutiboak 2022ko ekitaldi honetan asetzen ditu Hezkuntza Departamentuarekin kolaborazio hitzarmenak izenpetuta dituzten udal titulartasuneko Haur Hezkuntzako ikastetxeak kudeatzeko finantzaketa moduluak eguneratzean sortutako beharrak.
Zehazki, kredituaren hedapen honekin lortuko dira langileen soldata igoera, hezitzaileen kontratazioen hedapena, ordezkapenen hobekuntza eta egungo aurrekontu ekitaldiaren funtzionamendurako zenbatekoen eguneraketa.
Hezkuntzak joan den abuztuaren 16an ebazpen bat onartu zuen, hain zuzen 2022-2023 ikasturterako kontzeptu hauen zuzkiduran 4.304.287 euroko gastu totala dakarrena. Kopuru horretatik, 1.434.762 euro 2022ko aurrekontuari dagozkio eta 2.869.524 euro berriz, 2023koari. Ebazpenak haurren eskoletako pertsonalaren gastuen zenbateko ekonomikoak eguneratzen ditu, soldata oinarriak berdinduz kasu hauetan: B maila (urteko 23.753 euro); C mailako hezitzaileak (19.704 euro); eta D mailako garbiketako langileak (17.161 euro). Gainera, langile ordezkapenetan zenbatekoa hedatu da, % 8aren arabera.
Aurreko urtetan ez bezala, finantzaketa modulu honetan laguntzako heziketa langileen gastua erantsi da, helburua izanik hezkuntzako arreta hobetzea eta hezitzaileen lan-karga murriztea.
