Alba Delgadok zuzentzen duen Garapen Jasangarria eta Ingurune Naturalaren zinegotzigoak mugikortasun jasangarriaren alde apustu egiten jarraitzen du Barakaldon. Mugikortasunaren Europako Astearen ospakizunarekin batera, hirian bizikletaren erabilera sustatzeko jarduera-programa bat prestatu du arloak irailerako. Programa horrek lau ikastaro ditu – ibilgailu horretan ibiltzen ikasteko, trafikoaren artean zirkulatzen ikasteko, bizikletak elektrifikatzeko eta konponketak egiteko –, bai eta bizikleta-gymkhana bat ere.
Mugikortasun jasangarriak bizigarriago bihurtzen ditu hiriak, eta bizi-kalitatearen indizea handitzen du, ongizate ekonomiko, sozial eta hiritar handiagoarekin.
Eta kutsatzen ez duten ibilgailuen artean bizikletari protagonismoa eman nahi diogu, gainera ariketa fisikoa sustatzen duelako eta horrek pertsonen osasunean laguntzen duelako», argudiatu du Delgadok.
Jarduera horietan interesa dutenek izena eman dezakete www.bizieskola.net/barakaldo web-orrian, edo arratsaldeko ordutegian 632 582 067 zenbakira Whatsapp bat bidalita. Parte-hartzaileek opari bat jasoko dute, Decathlon-ek emana.
Jarduerak irailaren 12an (astelehena) hasiko dira. Egun horretan eta hurrengoan, 13an, Ilgner eraikinean, arratsaldeko seietatik aurrera, trafikoa dagoenean zirkulatzen ikasteko ikastaroa egingo da. Jardunaldi bakoitzak bi ordu iraungo du, eta eguneko, 10 tokiko edukiera izango du. Hiriek, oro har, zirkulazio handia izaten dute, eta ez da erraza bizikleta-erabiltzaileentzat hainbeste zirkulazio dagoen lekuetan mugitzea. Horregatik, oinarrizko jarraibide batzuk eman nahi dizkiegu», adierazi du Alba Delgadok.
Irailaren 12tik 16ra, Ilgner eraikinean bertan, bizikletaz ibiltzen ikasteko ikastaro batzuk egingo dira. 16:30etik 17:30era izango da egun horietako bakoitza, eta gehienez 10 plaza izango dira kasu bakoitzean.
Irailaren 19an, bizikletak elektrifikatzeko ikastaroa egingo da Ramón Rubial Lorategi Botanikoko Natura Gelan (Natur Gela), 18:00etatik 20:30era. Izan ere, bizikleta elektrikoek protagonismoa hartu dute azkenaldian, hirietako mugikortasuna errazten dutelako. 10 toki daude jarduera honetan parte hartzeko.
Irailaren 20tik 22ra bitartean, berriz, bizikletak konpontzeko oinarrizko ikastaro batzuk egingo dira leku berean. Tailer horiek bi orduz egingo dira, arratsaldeko seietatik aurrera, eta gehienez 10 parte-hartzaile izango dira eguneko.
Gymkhanari dagokionez, bizikletan, familian edo lagunen artean, larunbatean izango da, 11:00etatik 14:00etara, Ramón Rubial lorategi botanikoan. 60 plaza daude jarduera honetarako. «Monitoreek bizikletan erantzun beharreko galdera batzuk planteatuko dituzte, parte hartzen duten familiak energia-eredua aldatzearen garrantziaz jabetzeko eta inplikatzeko. Gymkhana amaitzean, parte-hartzaileek kontsumo-modu indibidual eta globalean klima-aldaketaz jabetzeak duen garrantziaz gozatu eta ikasi izanaren sentsazioa izango dute», zehaztu du Alba Delgadok.
