Eusko Jaurlaritzako Ekonomiaren Garapen, Jasangarritasun eta Ingurumen Sailari atxikitako Uraren Euskal Agentziak Bilboko Portuko saneamendu-sistema berriaren obren lehen fasea lizitatu ireki berri du. Lan horiekin, gaur egun dauden arazketa-instalazio ugari ordeztuko dira: araudiari egokituta izan arren, portu-eremu osoan sakabanatuta daude. Ordezko saneamenduaren proiektu aitzindari eta berritzaileak Bilboko Portua garapen jasangarrian erreferentziazko portu bihurtzeko urrats nabarmena emango du.
Bilboko Portuan 300 ha-tik gorako jarduera-eremua dagoenez, Santurtzin eta Zierbenan kokatutako portu-espazio guztietarako proiektatutako saneamendu-sistema berria hiru fasetan egikarituko da.
Orain lizitatzen diren obrak Santurtziko kaietara eta Espigoi Nagusira mugatzen dira: alegia, hondakin-urak bildu eta bideratzerko jarduketen I. faseari dagozkion esku-hartze eta instalazioak. Lizitaziorako oinarrizko aurrekontua 12,3 milioi eurokoa da, BEZa barne, eta Bilboko Portu Agintaritzak eta Uraren Euskal Agentziak finantzatuko dute % 50ean.
Egungo saneamendu-soluzio atomizatuak ordeztea
Gaur egun, arazketa-instalazio ugari daude portu-eremu osoan, eta horiek arduratzen dira ur sanitarioen eta industrialen kalitatea hobetzeaz, itsasora isuri aurretik. Tamaina eta tipologia askotarikoak dira: hobi septikoak isurketa txikiagoetarako, eta araztegiak tratamendu primario eta sekundarioekin industria-isurketa garrantzitsuenen kasuan.
Saneamendu-sistema berriarekin, dauden tratamendu-instalazioak bildu nahi dira kolektore-sare baten bidez, ur sanitarioak eta industrialak Galindoko Hondakin Uren Araztegira (HUA) eramateko, Bilbao Bizkaia Ur Partzuergoak (BBUP) kudeatuta. Horrela, itsasora egingo liratekeen isurketa bakarrak euri-urei eta hozte-urei dagozkienak izango lirateke, kutsatzeko ahalmen txikia baitute.
Saneamendu-sistema berriztatzailea
Aurreikusitako saneamendu-sistema hutsa baliatzen duen sistema bat da: hondakin-urak biltzeko ohikoagoa den grabitatearen edo bulkadaren bidez hondakin-urak bideratzen dituzten saneamendu-sistema arrunten ez bezalakoa. Saneamendua bideratzeko huts-sistema horrek dimentsio esanguratsuak ditu, EAEn aurrekaririk ez dutenak. Funtsean, hasieran, isurketak grabitatearen bidez kutxatila batzuetara iristen dira, eta, handik, hutsaren bidez xurgatzen dira, estazio bateraino; hortik, azkenik, egungo sareraino ponpatzen dira, Galindoko araztegira iristen den sareraino.
Portuko jardueraren etorkizuneko bilakaerara egokitu daitekeen saneamendu-sistema
Saneamendu-azpiegitura hori etorkizuneko eskaerei zerbitzua emateko gai izango da, eta aukera emango du aurrerantzean Bilboko Portuan jar daitezkeen jarduera berriak saneamendu-azpiegiturara konektatzeko. Horretarako, saneamendua urteko isurketa-bolumenetarako dimentsionatuta egongo da, 1,4 m m³ ingururaino, 45 l/s inguruko batez besteko emariarekin eta 70 l/s arteko puntako emariekin.
Proiektu osoak, gainera, Europar Batasunaren finantzaketa izango du, Berreskuratze, Eraldaketa eta Erresilientzia Planaren bidez (Next Generation EU).
