Barakaldoko Garapen Jasangarriko eta Ingurune Naturaleko zinegotzigoak, Alba Delgadok zuzentzen duenak, Hiri Baratze Ekologikoak arautzen dituen Ordenantza aurkeztu zien atzo udal talde politikoei. Aldez aurretik herritarrei kontsulta egiteko fase bat antolatu du, eta herritarrek udal webgunearen egoitza elektronikoaren bidez egin ahal izan dituzte ekarpenak.
«Araudi honekin Barakaldo berdeagoa eta jasangarriagoa eraikitzen jarraitu ahal izango dugu. Hiriaren eraldaketari esker berdegune eta parke zabal gehiago ditugu, adibidez Ramón Rubial Lorategi Botanikoa eta Munoa finka, eta, orain, gure udalerrian ere hiri-baratzeek presentzia handia izatea nahi dugu», azaldu du Delgadok.
Zinegotziak azpimarratu duenez, «hiri-baratzeak pertsonen arteko topaguneak dira, eta, gainera, lan pedagogikoa egiten da osasunarekin lotuta, elikaduraren bidez, eta oro har tokiko ekosistemaren kontserbazioan eta ingurumen-iraunkortasunean sakontzen dute. Hori guztia 2030 Agendan jasotako Garapen Jasangarriko Helburuen 11. puntuaren ildotik doa».
Ordenantza honen bidez arloak udal lurrak erabiltzeko baimenak arautu nahi dizkie bai entitateei bai bizilagunei banaka.
Nortasun juridikoa duten elkarte eta erakundeei emandako baimenak lehia askeko erregimenean emango dira, bidezko deialdira aurkeztutako proiektuak baloratu ondoren. Asmoa da deialdi horietan Elkarteen Udal Erregistroan erregistratutako elkarte guztiek parte hartu ahal izatea, baldin eta udalerriko beste elkarte eta gizarte-talde batzuekin batera baratzeko lursailaren erabilerak kudeatzeko ingurumen-hezkuntzako programa bat aurkezten badute.
Beste alde batetik, kupo horietako bakoitzean emango diren banakako baimenak zozketa bidez banatuko dira baldin eta interesdunen eskaera gehiago badaude kupo horretan partzelak baino. Esleipen-zozketan geratuko den ordenaren arabera eskatzaileen itxaron-zerrenda sortuko litzateke kupo bakoitzeko.
Gainera, zaintza-konpromisoari balioa emateko, dagokion ordenantza fiskalean lurzati bakoitzaren esleipendunak ordaindu beharreko tasa zehaztuko da eta esleipendunaren egoera berezien arabera hobaria jaso ahal izango da.
