Legegintzaldiaren hasieratik Lanbide Euskal Enplegu Zerbitzu Publikoa egiten ari den eraldaketa-prozesua bere irudi korporatibora iritsi da. Idoia Mendia Lehendakariorde eta Lan eta Enplegu sailburuak Lanbideren logo berria aurkeztu du gaur, herritarrei zerbitzu hurbila eta eraginkorra emateko bokazioa helarazteko.
Mendiak gogorarazi du Enplegu Zerbitzuaren eraldaketa Gobernu Programaren konpromiso bat dela, eta nire Sailaren lehen konpromisoa: Lanbide eraginkorra izatea gutxieneko errenta eta kalitatezko enplegua izateko eskubidea bermatzeko, eta enpresek eraldaketa handietarako egokiak diren lanbide-profilak dituztela bermatzeko.
Gaineratu duenez, Lanbide Hobetzen izeneko prozesu horrek guztiak Lanbideri buelta ematea eskatzen du, funtzionatzeari utzi gabe, eta, horregatik, Administrazio Kontseiluaren eta bertako langileen inplikazioa nabarmendu du. Horiekin, antolaketa, funtzionamendua, programak eta eragiten dioten legeak aldatzen hasi gara. Eta orain zerbitzu publikoak etorkizunean izango duen irudi berria aurkeztuko dugu.
Ildo horretan, berretsi du legegintzaldi honetan gur konpromisoa ez zela Lanbide kudeatzea, eraldatzea baizik. Eta horrek funtsak eta formak aldatzea dakar, eta inertzia gehiegik oztopatutako zerbitzu publiko baten pertzepzioa ere aldatzen joatea. Lanbide berreraikitzen ari gara, ate txikia izateari utz diezaion, beste ezer ez dutenak bakarrik sar daitezen, eta ate handi bat izan dadin enplegu bila dabiltzanentzat, lana hobetu nahi dutenentzat eta aukerak eskaintzen dituzten enpresentzat.
Lehendakariordeak azaldu duenez, prozesu eraldatzaileak aurrera jarraitzen du, “baina irudi honetan eta bulego lagunkoien proiektuan islatzen da. Bulego fisiko horiek diseinu berriak dituzte arreta desberdina emateko, erabiltzaileek eta langileek esan digutena entzun ondoren”. Mendiak, Gloria Mugica Lanbideko zuzendari nagusiarekin batera, uste du eredu zuzenagoa, errazagoa eta eraginkorragoa eraikitzen ari bagara, herritarrek errazago eta zuzenago identifikatu behar dutela, eta bulego bakoitzera errazago hurbildu behar dutela.
Era berean, aurreratu du diseinu berri hori pixkanaka-pixkanaka hedatuko dela datorren urtean, funtsezko bi gairengatik: bata, iraunkortasunari buruzkoa, erabiltzeko moduan dagoen materiala ez dela kendu behar uste dugulako, eta, bestea, ekonomikoari buruzkoa; izan ere, uste dugu ez dela material guztia errotik aldatzeko gasturik egin behar, bulegoei edo papergintzari dagokienez, irudi kontua besterik ez delako.
