Eusko Jaurlaritzak, lehenengo lehendakariorde eta Segurtasuneko sailburuaren aginduaren bidez, onartu du 15.000 euroko dirulaguntza ematea Larrialdiei Aurre Egiteko Euskal Sistemako partaide den Euskal Espeleologoen Elkargoa-Unión de Espeleólogos Vascos elkarteari, Euskadiko boluntario-erakundeetako bat izanik. Elkarte onuradunak 2021ean bi aldeek izenpetu zuten Lankidetza Hitzarmenean hartutako konpromisoak bete beharko ditu.
Dirulaguntzak, besteak beste, espeleologiari buruzko lanak argitaratzearekin, jardunaldi teknikoak antolatzearekin eta Euskadiko barrunbeen katalogoa osatu eta mantentzearekin zerikusia duten hainbat jarduera sustatzera konprometitzen du elkartea.
Euskal Espeleologoen Elkargoa-Unión de Espeleólogos Vascos elkartea administrazio publikoekin lankidetzan jarduten duen erakunde bat da. Berez, bere estatutuen arabera bere helburuen artean ezbeharrek eta hondamen publikoek eragindako ekintzetan esku hartzea dago.
Elkarteak eskarmentu handia du larrialdi-egoeretan herritarrei laguntzeko eta babes zibilaren arloko lanetan, eta Eusko Jaurlaritzarentzat balio handiko lankidetza-erakunde eraginkorra da, beraz.
Segurtasun Sailera atxikitako Larrialdiei Aurre Egiteko eta Meteorologiako Zuzendaritza arduratuko da dirulaguntza kudeatzeaz.
