[H]ARTE fundazioarekin egindako lankidetza-hitzarmenari esker, Osakidetzako Ezkerralde-Enkarterri-Gurutzetako Erakunde Sanitario Integratuak Gurutzetako Unibertsitate Ospitaleko eraikin nagusiko sei solairuetako itxarongeletan erakusketa bat egingo du 2023ko urtarrilaren 26tik ekainaren 25era (fundazio horrek EAEko zentro sanitario batean antolatzen duen lehena), fundazio horrenak diren 24 grabatu originalez osatua. Alaitasuna, bakea, kolorea eta energia transmititu nahi dira, ospitaleak leku abegikorrak, humanoak eta artistikoak izan daitezen. Proiektuaren helburua da ospitalean arteak duen botere terapeutikoari balioa ematea, pazienteen bizi-kalitatea areagotzen laguntzen duten jarduera osagarriekin, eta emandako zerbitzuen garrantzia nabarmenduz. Gurutzetako Unibertsitate Ospitalean ikusgai egongo den sei hilabeteko epean, 100.000 pertsona inguruk ikusi ahal izango dute.
Amalia Avia, Antonio Lorenzo, Juan Navarro Baldeweg, Amadeo Gabino, Manuel Quejido, Miguel Ángel Campano, Albert Ràfols-Casamada eta beste artista nabarmen batzuen lanak ikusi ahal izango dira. Gurutzetako Unibertsitate Ospitaleko zuzendari María Luz Marqués doktorea, BBVAko Iparraldeko zuzendari Carlos Gorría eta [H]ARTE fundazioaren sortzaile Tamara Kreisler eta Silvia Centeno izan dira inaugurazioan. [H]ARTE irabazi-asmorik gabeko erakundearen helburua da arteak gaixoei, senideei eta osasun-langileei laguntzea, ospitaleko esperientzia humanizatuz eta aberastuz.
Hala, Osakidetzako Ezkerralde-Enkarterri-Gurutzetako ESIak beste urrats bat eman du, arte-erakusketen eta horiekin lotutako jardueren bidez, estresa eta antsietatea murrizteko, gogo-aldartea hobetzeko eta Gurutzetako Unibertsitate Ospitaleko espazioetan parte hartzen duten pertsonen esperientziaren kalitatea hobetzeko, bai pazienteena, bai laguntzaileena, bai osasun-profesionalena. Mª Luz Marqués zuzendari gerenteak dioenez: «[H]ARTE fundazioarekin hitzarmen hau sinatu dugu gure pazienteei ematen diegun osasun-laguntzari eta artatzen dugun komunitatearekiko dugun konpromisoari balioa emateko. Humanizazioa da gure erronka estrategikoetako bat, balioan oinarritutako medikuntzarekin, segurtasun klinikoarekin, asistentzia-mailen arteko integrazioarekin eta espezializazio handiarekin batera, besteak beste».
Bestalde, proiektu honekin, BBVAk EAEn duen konpromiso kulturala indartzen jarraitzen du, artea eta kultura pertsonen bizitza positiboki eraldatzeko funtsezko elementuak diren ekintzak bultzatuz. «Proiektu hau BBVAk EAEko pertsonen kulturaren eta ongizatearen alde egindako apustuaren barruan sartzen da», adierazi du Carlos Gorría BBVAko Iparraldeko zuzendariak. Horrela, BBVAk [H]ARTE fundazioaren laguntzari esker egin ahal izan den erakusketa hau eskaini du. Fundazio horren sortzaileek, bi urtez proiektuaren buru izan ondoren, arteak ospitale kolaboratzaileetan duen eragin positiboa baieztatu ahal izan dute. «Guretzat poz handia da Bilbon lanean hastea eta artearen botere terapeutikoa ospitalean denbora eman behar duten gero eta pertsona gehiagorengana hurbiltzea. Osasunarekin konprometituta gaude zentzu holistikoan, gorputzaren eta adimenaren dimentsio bikoitzean», azpimarratu dute.
Ibilbide bat sei solairutan
BBVAk Gurutzetako Unibertsitate Ospitalerako garatu duen proiektuak («Leihoan zehar») irudizko bidaia bat egitera gonbidatzen du ikuslea, errealitateari begiratzeko modu berri bat proposatzen duten funtsetako 24 lanen bidez. Gainera, ikus daitezke, batetik, azken mendeetako Espainiako artearen bereizgarri den sormenezko aniztasuna eta, bestetik, BBVAren Arte Bilduman hori nola dagoen ordezkatuta.
Bidaia lehenengo solairuan hasiko da, Amalia Aviaren (1930-2011) Itxaronaldia lanarekin eta paisaiaren gaiari buruz eta berau osatzen duten elementuen sinplifikazioan oinarrituta ikuspegi abstraktutik hausnartzen duten hiru lanekin, eta ikuspegi naturalista eta introspektibo batetik, Dimitri grabatzaileak Aurora bere urtintan proposatzen duena bezalakoa.
Bigarren solairuan Antonio Lorenzo eta Abel Rasskin artisten grabatuak daude: agertoki onirikoak erakutsiz, irudimenaren munduko pertsonaiez eta formez jositako unibertso surrealistetara eramango gaituzte. Hirugarren solairua, berriz, hegaldiari eskainia dago, Juan Navarro Baldewegen edo Riera i Aragóren lanetan iradokia.
Hurrengo bi solairuetan (garraioak eta toki otoituak) garraiobideen grabatuak eta zenbait helmuga –Grezia eta Japonia, kasu– aipatzen dituzten irudiak agertzen dira, baita Amadeo Gabinoren 1991ko grabatu delikatu bat ere, azken atalari bide ematen diona: Paisaia abstraktuetarako leihoak, seigarren solairuan. Bertan, Albert Ràfols-Casamada, Joaquín Capa, Miguel Ángel Campano, Manuel Quejido, Josep Guinovart eta Jorge Abot artisten sorkuntza abstraktuak daude ikusgai. Leiho gisa eta lehen solairuarekin gaiaren bidez lotuta, formak eta koloreak paisaien ikuspegi ez-figuratiboak eratzen dituzten beste dimentsio batera irekitzen dira lanok, ikusi ezin dena ikusgarri eginez.
Gainera, erakusketak esperientzia estetikoa eta sentsoriala konbinatu nahi ditu, artelanak ikusten diren bitartean musikaz gozatzeko berariaz eratutako musika-zerrenda bati esker. Gainera, grabatu bakoitzak kartela bat du, datu teknikoekin eta QR kode batekin. Kode horrek musika-piezak, eta proiektuari, BBVA Bildumari, [H]ARTE fundazioari eta Osakidetzaren Gurutzetako Unibertsitate Ospitaleari buruzko informazio gehigarria du.
