Eusko Jaurlaritzako Lan eta Enplegu Sailak eta Iseak Fundazioak WORKINLan Summit-Enplegua etorkizuneko Euskadin izeneko nazioarteko bi jardunaldi antolatu dituzte, Euskadik epe labur eta ertainean beharko duen enpleguari buruz eztabaidatzeko, hausnartzeko, aztertzeko eta proposamenak egiteko. Horretarako, Europako Batzordeak, Espainiako Gobernuak, Foru Aldundiek eta Udalek parte hartuko dute, bai eta esparru zientifiko eta akademikoko pertsona ospetsuek ere, hala nola Ekonomia Nobel Saria 2021, David Card. Topaketak interes handia sortu du eta, gaur egun, 600 pertsona baino gehiago daude izena emanda.
Bilerak otsailaren 16an eta 17an egingo dira, Bilboko Euskalduna Jauregian, eta Euskadiko Enpleguaren Liburu Zurian dute jatorria. Iseak Fundazioak egin zuen iaz, Lan eta Enplegu Sailak proposatuta, eta “Euskadin enpleguaren iragana, oraina eta etorkizuna ulertu nahi ditu, batez ere aurrean dituen erronka handiei erreparatuta: trantsizio demografiko, teknologiko eta klimatikoak”, Sara de la Rica fundazioko eta proiektuko zuzendariaren hitzetan.
Liburu hori WORKINLan Summit-eko parte-hartzaileei emango zaie, eta egun horretatik aurrera eskuragarri egongo da erakunde eta pertsona interesdun guztientzat. Hausnarketa-esparru bat proposatzen du, euskal gizarte osoarentzat produktibitatea eta kalitatezko enplegua sustatzeko neurri zehatzak bideratzeko, eta, bereziki, aldaketa sakon horiek ematen dituzten aukerak baliatzeko, ez soilik enplegu gehiago eta hobea sortzeko, baizik eta baita “hain desberdina ez den eta bidezkoagoa eta ekitatiboagoa den gizarte bat eraikitzeko” ere.
Horretarako, iturri eta erreferentzia zientifiko ugari izan dira, eta horietako batzuek ekitaldian parte hartuko dute, hala nola David Card Ekonomiako Nobel Saria. Saridun horrek topaketa akademikoa irekiko du “Ikerketa ekonomikoa eta politikak: Immigrazioa eta gutxieneko soldata” hitzaldiarekin. Saio horretan bertan, eta Liburu Zuria azaldu ondoren, hiru mahai-inguru egingo dira, trantsizio energetiko-klimatikoari, demografikoari eta digitalari buruzko teoria eta praktika kontrastatzeko, eta horiek enpleguan duten eraginaz.
Bigarren saioan, honako hauek parte hartuko dute: Jan, Eeckhout irakasleak, zeinak bere hitzaldian, “Onuren paradoxa: Enpresa batzuek enpleguaren etorkizuna mehatxatzen dute”, Euskadik behar duen enpleguan lan-baldintzen garrantzian oinarrituko baita; Stéphane Carcillo ELGAko Enplegu, Lan eta Gizarte Gaietako Zuzendaritzako Enplegu eta Diru-sarreren Ataleko buruak; eta Harvard Unibertsitateko Stephanie Stantcheva irakasleak, zeinak “Enplegu onen ongizatearen estatuaren agenda” izango baitu mintzagai.
Erakundeen arteko lankidetza
Agenda akademikoa, Liburu Zuriarekin ez ezik, Lan eta Enplegu Sailak legegintzaldi honetan enplegu hobea sortzeko duen proiektuarekin ere lotzen da. Konpromiso horrek, Idoia Mendia Lehendakariordeak gogora ekarri duenez, “gizarte osoari eragiten dio eta gizarte osoa behar du”. Horregatik ireki zaie WORKINLan Summit erakunde eta eragile ekonomiko eta sozial guztiei; izan ere, “eztabaidarako eta ideiak trukatzeko gune bat sortu nahi dugu, non euskal enplegu-ekosistemako eragileek parte hartuko duten, enpleguaren eta desberdintasunaren arloko lehen mailako pertsona akademikoekin batera”.
Horrela, inaugurazio-ekitaldian honako hauek hartuko dute parte: Lehendakariordeak, Bilboko alkatearekin batera; Nicholas Schmit Enplegu eta Gizarte Eskubideen Europako komisarioak; Nadia Calviño eta Teresa Ribera Espainiako Gobernuko Presidenteordeek; eta José Luis Escrivá Inklusio, Gizarte Segurantza eta Migrazio ministroa ere bertan izango da. Bigarren jardunaldian Iñigo Urkullu Lehendakariak emango dio amaiera Summitari. Jardunaldi horretan parte hartuko dute Bilboko, Donostiako eta Gasteizko udalek eta Bizkaiko eta Arabako Foru Aldundiek, enpleguaren arloko arduradun gorenekin, ekitaldiaren inguruan sortutako jardueren bitartez.
Programari eta jarduera paraleloei buruzko informazio osoa: https://workinlan.eus/
