“Gure esker ona Juleneri eta bere belaunaldiko emakume guztiei. Ziur nago enbor horretatik beste erreferente femenino asko sortuko direla”- esan du
Lehendakaria gaur goizean Azkoitiko Udalak Julene Urzelairi (Azkoitia, 1912 – Caracas, 1983) eskaini dion omenaldian izan da. Julene EAB-Emakume Abertzale Batzako militantea izan zen eta gizarteari egindako ekarpenagatik eta berdintasunaren aldeko borrokagatik jaso du omenaldia. Beatriz Artolazabal sailburuarekin batera, Lourdes Umerez artista azkoitiarraren oroimenean egindako busto baten inaugurazioan izan da Iñigo Urkullu. Ekitaldian izan da, besteak beste, Julenen semea ere, Caracasetik berariaz etorrita.
Ondoren, lehendakaria eta gainerako parte-hartzaileak «Emakumeak Aberria Eginez» erakusketaren inaugurazioan izan dira. Erakusketa otsailaren 26ra arte bisitatu ahal izango da. Emakume Abertzale Batzak egindako lanaren omenaldia da erakusketa, eta Julene Urzelai elkarte horren ikono bat izan zen.
Bere hitzaldian, Lehendakariak onartu du emakumeek “funtsezko ekarpena” egiten diotela Euskadiren historiari. “Julene, eta Emakume Abertzale Batzako emakumeak, gure historia dira. Gure parte dira. Gure herriaren zutabe eta zutabe sendoak dira. Ekarpen handia egin zuten, eta inoiz ezingo diegu eskertu haien lana”- esan du.
Julenek bezala, bere belaunaldiko emakume askok ez zutela bizitza erraza izan gogorarazi ondoren –izan ere, bidegabeko gerra krudel batek errotik zapuztu zituen beren ametsak eta erbesteratzeko bideari ekin behar izan zioten–, Iñigo Urkulluk emakume horien ondarea babestu eta zabaltzen laguntzearen alde egin du
“Asko zor diegu horrelako emakumeei. Gure esker ona Juleneri eta bere belaunaldiko emakume guztiei. Ziur nago enbor horretatik beste emakume-erreferente asko sortuko direla”- esan du amaitzeko.
