Eusko Jaurlaritzako Lehendakariorde eta Lan eta Enpleguko sailburu Idoia Mendiak inertzietatik irteteko eta berritzera ausartzeko eskatu die eragile instituzional, sozial eta ekonomiko guztiei, eta ohartarazi du giza kapitalean inbertitzen ez dutenak lehiakortasunetik kanpo geratuko direla, bizi ditugun trantsizio handien aurrean. Ildo horretan, baieztatu du bere Sailaren Erabaki Nagusia pertsonak aldaketa ekonomiko horietara egokitzeko gaitasuna eskubide bihurtzearen aldeko apustua dela.
Lehendakariordearen hitzak Bilboko Euskalduna Jauregian egingo den WORKINLan Summit irekiera-ekitaldian izan dira. Sailak eta Iseak Fundazioak antolatu dute, eta Bilboko alkate Juan María Aburto jaunaren ongietorriarekin hasi da. Nicolas Schmit Enplegu eta Gizarte Eskubideen komisarioak eta Nadia Calviño, Yolanda Díaz eta Teresa Ribera Espainiako Gobernuko hiru presidenteordeek hartu dute parte ekitaldi instituzionalean. Bertan, zientzia-, akademia-, ekonomia- eta gizarte-arlo guztietako 600 ordezkari izan dira, besteak beste, David Card Ekonomia Nobel Saria eta Sara de la Rica Iseak Fundazioko zuzendaria. Erakunde horrek topaketa diseinatu du, eta saio hauetan aurkezten den Euskadiko Enpleguaren Liburu Zuria egin du.
Idoia Mendiak azpimarratu duenez, Summit hori erronka anitza da parte hartzen duten pertsona eta erakunde guztientzat, eta Euskalduna Jauregiko “paretetatik ateratzeko” bokazioa ere azpimarratu du, herritar guztiengana iristen saiatzeko; izan ere, hori guztia, salbuespenik gabe, enplegurako erronken eraginpean dago, bizi ditugun trantsizio handien aurrean.
Berritzera ausartzea
Adierazi duenez, trantsizio horiei ezin zaie “adabakien” bitartez soilik aurre egin, “berritzera ausartzea” beharrezkoa da, erantzun “partekatu eta lerrokatuekin. Nabigazio-karta partekatzen dugu, helmuga finkatuarekin eta norabide jarraituarekin. Astintzen jarraituko gaituzten denboraleak saihesteko, non erakundeak eta eragile sozial eta ekonomikoak ezin baikara denboren kudeatzaile huts izan. Administraziook, arlo publikoan, kohesioaren bermea eta eraldaketaren bultzatzaileak izan behar dugu. Eta eragile pribatuekin eta gizarte-eragileekin elkartu behar dugu. Zailtasun-uneak dira eta, elkarrekin bakarrik, lerrokatuta, aukera bihur ditzakegu, inor, ezein enpresa, ezein pertsona, atzean geratu gabe”, azaldu du.
Lehendakariordeak ohartarazi du orain hartzen diren erabakiek eta hartzen ez direnek definituko dutela “zer enplegu nahi dugun etorkizuneko Euskadirentzat”. Ildo horretan, baieztatu du bere Saila, datorren Enplegu Legearen bitartez, berritzailea izango dela, eta eskubide berri bat sortuko duela, pertsona guztiek, langabeek zein landunek, zerbitzu publikotik bermatuta izan dezaten beren prestakuntza eguneratzea, inor eskegita geratu ez dadin eraldaketa handi horien aurrean. “Izan ere, hor jokatuko da, giza kapitalean inbertitzean, herrialdeen lehiakortasunaren partidan. Trantsizio handi guztiek inbertsio handiak behar dituzte teknologia berrietan, baina, batez ere, inbertsio handiak pertsonengan, enpleguaren kalitatean. Horixe izango da faktore bereizgarria, eta horixe da Eusko Jaurlaritzako Lan eta Enplegu Sailaren apustu irmoa”, adierazi du.
Horregatik, Idoia Mendiak “aurreiritzietatik urruntzeko eta lehen probatu gabeko politika publiko berriekin arriskatzeko” eskatu die parte-hartzaile guztiei, “enpresa- eta sindikatu-kultura berri batekin, datozen garaietarako jarrera berriekin. Garai horietan, berritzera ausartzen ez dena, errezeta zaharretan geratzen dena, hondartuta geratuko da. Eta ezin dugu onartu”, amaitu du.
