Uraren eta energiaren zerbitzuengatiko erreklamazioak % 89 igo dira eta erreklamazio gehien jasotzen dituzten enpresek, telefoniakoek, % 20 egin dute behera
Turismo, Merkataritza eta Kontsumoko sailburu Javier Hurtadok Kontsumobideren 2022ko jardueraren balantzearen memoria aurkeztu du gaur Kontsumobideko zuzendari Laura Alzolarekin batera.
Sailburuak gogorarazi du Kontsumobidek hamargarren urteurrena ospatu zuela 2022an eta “urte horietan zehar kontsumitzaileen eta erabiltzaileen eskubideak babesteko erreferente gisa finkatu da. Eta heldu diogun erronka handienetako bat da Kontsumitzaileen eta Erabiltzaileen Estatutu berri bat garatzea, Legebiltzarrean izapidetzen ari dena”.
Kontsumobideren memoriaren datu nabarmenei dagokienez, erreklamazioen online tramitazioak gora egin duela egiaztatu da (% 9 baino ez zen 2019an). 2022an, berriz, % 50,5ekoa da eta, lehen aldiz, Kontsumobiden aurkeztutako erreklamazio, kexa eta salaketen erdia baino gehiago modu telematikoan erregistratu dira “oraindik ere ezinbestekoa den arreta presentzialaren osagarri gisa”.
2022an igo egin dira erreklamazioak: 28.645 guztira. Telefonia da erreklamazio gehien jasotzen duen sektorea, nahiz eta % 20 jaitsi den. Bigarren postuan energia-, ur- eta bestelako hornidura-zerbitzuetako erreklamazioak daude: % 89 hazi dira (erreklamazio guztien % 13). Arrazoi horregatik egindako kontsultak ere % 67 handitu dira.
“Erreklamazio gehienak ez dira zehapen-prozeduretan amaitu; izan ere, ez ziren arau-hausteen ondorio, fakturetan sartutako berrikuntza guztien ondorio baizik, denok ezagutzen dugun egoeragatik, eta zalantza asko sortu dituzte kontsumitzaileen artean”.
Ildo horretan, Kontsumobidek ahalegin handia egin du elektrizitatearen fakturei eta beste zerbitzu batzuei buruzko zalantza guztiak argitzeko, ez bakarrik kontsultei eta erreklamazioei erantzuteari dagokionez, baita prestakuntza-arloko informazio-material eta formatu berriei dagokienez ere. “Prestakuntza baita modu kontzientean eta arduratsuan kontsumituko duen gizartea eraikitzeko oinarrietako bat. Pandemia iritsi zenetik, prestakuntza-eredua bideratzea erabaki zen, modalitate berriak kontuan hartuta. Modalitate horiek online espazio gehiago sartzeaz gain, prestakuntza presentziala ere indartu eta hobetu nahi zuten, gure publiko xedea identifikatuz eta bideratuz”.
Prestakuntza hori 44 prestakuntza-esperientziatan eta 30 proiektutan gauzatu da, eta ia 29.000 pertsonak parte hartu dute; horrek esan nahi du % 30eko igoera izan dela 2021arekin alderatuta.
Sailburuak Kontsumobideren lan horren garrantzia azpimarratu du hau adieraziz, “beharbada ez da ezagunena izango, baina informazio eta sentsibilizazio lanarekin batera, funtsezkoa da eraiki nahi dugun gizarterantz eboluzionatu ahal izateko. Ez dugu ahaztu behar gure gaurko kontsumoa biharko mundua izango dela, eta gaur ordaintzen ez dugun prezioa beharbada garestiago ordainduko dugula etorkizunean”.
Azkenik, Kontsumobideko zuzendariak beste datu batzuk azpimarratu ditu, esaterako ikuskaritzen kopurua 2021ean 3.048tik 2022an 3.958ra igo izana. Era berean, kontsumo-arbitrajeari atxikitako enpresak 16.000 izatetik 16.413 dira orain.
