Euskal ekonomiak “hazkunde sendoko” eremuan jarraitzen du urte honen hastapenean, 100 puntutik gora mantendu baita otsaileko erregistroa (101,1) ezagutu ondoren. Datu hori, hala ere, abendukoa (110,9) baino txikiagoa da, Ekonomia eta Ogasun Sailak otsailean prestatutako termometroan jasotakoaren arabera.
Inbertsioaren hazkundea moteldu izanaren ondorio da desazelerazioa, nahiz eta kontsumo pribatuarena mantendu egin den urtarrilaren aldean. Sektoreka, eraikuntzak eta zerbitzuek bizitasuna galdu dute, eta badirudi industriak pixka bat gora egin duela. Enpleguak beste hilabete batez eutsi dio bere dinamismoari.
Ukrainan gatazka hasi eta urtebetera, haren ondorioek eragina izaten jarraitzen dute munduko ekonomian, eta horrek isla du euskal ekonomian, nahiz eta atzeraldi posible baten itzala atzean geratu den. Horrekin guztiarekin, pandemiaren ondorengo susperraldia ahuldu egin da.
2021eko apiriletik, EAEko ekonomia “hazkunde sendoko” eremuan mantentzen da. Urte horretako maiatzean lortu zuen bere daturik onena (145,5 puntu) euskal ekonomiaren termometro honetan. 2022a 113,1 punturekin itxi zen.
Termometroa hilero egiten da, euskal ekonomiaren 100 adierazletik gora oinarri hartuta, eta hilabete bakoitzaren lehen egunetan argitaratzen da.
