- Bisita Habanako Unibertsitateko Berrikuntza eta Garapenenerako Fundazioaren, Tecnalia Fundazioaren eta eLankidetza-Garapenerako Lankidetzako Euskal Agentziaren arteko kolaborazio-hitzarmen baten baitan dago, Kuba eta Euskadiko berrikuntza ekosistemak konektatzea bilatzen dituena
Kubako erakundeetako ordezkariak Euskadin izan dira martxoaren 11etik 18ea, zientzia, teknologia eta berrikuntza euskal sistema osatzen duten politikak, eragileak eta tresnak bertatik bertara ezagutzeko.
Bisita Tecnalia Fundazioak eta eLankidetzak antolatu dute elkarrekin, eta euskal berrikuntza ekosistemara hurbiltzea izan du helburu. Tartean, bilerak egin dituzte zientziarekin, teknologiarekin eta berrikuntzarekin lotutako Eusko Jaurlaritzako hainbat zuzendaritza eta erakunderekin, bai eta bisitak eta lan saioak izan dituzte Euskadiko Parke Zientifiko eta Teknologikoen Sarearekin.
Lan agendak bi hurbilketa zehatzago ere ahalbidetu ditu; alde batetik, toki garapenaren, gizarte-berrikuntzaren eta ekintzailetzaren arloan, delegaritzak bisitak eta topaketak egin ditu Bilbao Ekintzarekin, Ekonopolorekin, AS Fabrikekin edo Bilbao Berrikuntza Faktoriarekin, eta, bestetik, osasun-berrikuntzaren arloan, Eusko Jaurlaritzako Osasun sailarekin, Biocruces Bizkaia Institutuarekin eta Basque Health Clusterrarekin bildu da, besteak beste.
2021ean, Habanako Unibertsitateko Berrikuntza eta Garapenenerako Fundazioak, Tecnalia Fundazioak eta eLankidetzak Kubako eta Euskadiko berrikuntza-ekosistemak lotzeko lankidetza-hitzarmena sinatu zuten, eta bisita horren baitan dago. Hitzarmen horren xedea da bi lurraldeen arteko aliantzak sortzea eta esperientziak trukatzea, hala nola berrikuntza teknologiko-zientifikoa, talentu teknologikoa erakartzea eta ikerkuntza bikaintasuna bezalako erronkei elkarrekin aurre egiteko, garapen sozial eta ekonomikoa hobetzeko.
Aste bukaeran, misio kubatarrak, Tecnalia Fundazioak eta eLankidetzak lantegi bat izan dute bi berrikuntza ekosistemen arteko lotura aukerak identifikatzeko eta hurrengo urratsak zehazteko.
