- Iruzurraren aurka borrokatzeko tresnak antzeman du enpresetan egiturazko postuak horrela betetzen ari daitezkeela
Euskal Autonomia Erkidegoko Lan Ikuskaritzak 340 gutun bidaliko dizkie aste honetan Euskal Autonomia Erkidegoko beste horrenbeste enpresari, Iruzurraren Aurkako Tresnaren arabera egoera irregularrean egon daitezkeen 1.766 kontratuen egoera berrikus dezaten. Zehazki, Aldi Baterako Laneko Enpresen bidezko kontratazioa egiturazko beharrak betetzeko behin eta berriz erabiltzeari buruzkoak dira.
Azken urteotan ohikoa den bezala, jarduera hori Estatuko Laneko eta Gizarte Segurantzako Ikuskaritzarekin lankidetzan egiten da, Iruzurraren aurka Borrokatzeko Tresna batera garatuz eta erabiliz. Sistema informatiko horrek lan-arloko arau-haustetzat har daitezkeen egoera irregularrak detektatzen ditu. Iruzurraren aurka borrokatzeko tresnak, teknologia erabiliz, aukera ematen du datuak gurutzatzeko eta kontratazioaren arloan irregulartasunak edo arau-urratzeak gerta daitezkeen egoerak detektatzeko.
Aste honetan bidaliko diren gutunetan azaltzen denez, Aldi Baterako Laneko Enpresen (ABLE) bitartez egiturazko premiak betetzeko kontratazioa behin eta berriz erabiltzea lege-iruzurra da, kontratazio hori aldi baterako kontratuekin, aldizkako kontratu finkoekin edo ohiko kontratu finkoekin formalizatzen den alde batera utzita. 340 kasu horietan antzeman da izaera iraunkorreko plantillako zenbait lanpostu mota horretarako egokiak ez diren kontratuekin betetzen ari daitezkeela. Jokabide hori gaur egun enplegatuak altan dituzten enpresen % 0,03an baino ez da ikusten.
340 eskutitzetatik 110 Arabako enpresei dagozkie (703 kontraturekin), 88 Gipuzkoakoei (471 kontratu) eta 142 Bizkaikoei (592 kontratu). Guztira, 1.766 langileri eragin liezaieke.
Era berean, egoera horren eraginpean dauden 12 ABLEek ere jakinarazpen bat jasoko dute, horren berri izan dezaten. Hala ere, gogorarazten zaie enpresa erabiltzaileak jakinarazpena jasotzen duenetik hilabeteko epean ez baditu kontratu arrunt propioak bihurtzen, haiek ikuskapen-lana egin ahal izango dutela. 12 gutunetatik 3 Arabako aldi baterako enpleguko enpresenak dira, 3 Gipuzkoakoak eta 6 Bizkaikoak.
