Euskal Herriko Agintaritzaren Aldizkarian argitaratu da gaur Euskadiko Gazteak Lankidetzan/Juventud Vasca Cooperante programaren 2023ko deialdian izena ematea eta parte hartzea arautzen duen ebazpena.
Eusko Jaurlaritzako Gazteria Zuzendaritzak eta Garapenerako Lankidetzaren Euskal Agentziak antolatutako programa bat da Euskadiko Gazteak Lankidetzan. Programa horren helburua da Euskadiko gazteak sentsibilizatzea hegoaldeko herrialdeetako lankidetza-ekintzetan, eta herrien eta kulturen arteko elkartasun-kultura sustatzea.
1993an sortu zen, eta aurten 30 urte bete ditu. 2020an eta 2021ean bakarrik eten zen pandemiaren ondorioz. 28 edizio horietan 2.399 gaztek eta 100 GGKE baino gehiagok parte hartu dute, bai Euskadikoak, bai Hegoaldeko herrialdeetakoak. Hautatutako pertsonek hiru hilabetez parte hartzen dute garapenerako lankidetzako ekimenetan Amerika, Asia eta Afrikako herrialdeetan; horri esker, «in situ» ezagutu dezakete horrelako programen garapena, eta programa horiek sustatzen lagundu.
Programan parte hartu nahi duten gazteek Euskal Autonomia Erkidegoko udalerri batean egon behar dute erroldatuta martxoaren 28a baino lehen, eta 1993tik 2001era bitartean (biak barne) jaiotakoak izan behar dute. Gainera, jakin behar dute proiektua garatuko den herrialdeko hizkuntza, eta helmugako herrialdean eskatzen diren prebentziozko osasun-neurriak hartu behar dituzte.
Eskabideak aurkezteko epea bihar, martxoak 29, hasiko da, eta 2023ko apirilaren 21ean amaituko da. Eskabideak Internet bidez egingo dira, eta identifikazio elektronikorako bitarteko bat beharko da. Izena emateko eskabidea hemen dago eskuragarri: www.gazteaukera.euskadi.eus.
Aurre-hautaketako fasea apirilean egingo da, eta gazteak aurrez hautatuko dira, haien curriculum vitae-aren (ikasketak, lan-esperientzia, ikastaroak, kezkak) eta GGKEek aurkeztutako proiektuen arabera.
GGKEek profil oso zabalak eskatzen dituzte: begirale-titulua duten pertsonak; mekanika, elektrizitatea, ingeniaritza, berdintasuna, irakasletza, psikologia edo erizaintza bezalako ikasketak dituzten pertsonak, besteak beste; edo musika-tresna bat jotzen edo janaria prestatzen dakitenak, adibidez.
Erreferentziazko esperientzia
Gazteria Zuzendaritzak gazteak programa honetan izena ematera eta parte hartzera animatu nahi ditu; izan ere, 28 edizioen ebaluazioak berretsi egiten du programan parte hartzen dutenak erreferentziako esperientzia bat bizi dutela bizitza osorako, eta oso aberasgarria dela arlo pertsonalean.
Gehienez ere, aurrez hautatutako 200 pertsonak parte hartuko dute Barriako aterpetxean (Araba) maiatzaren 12tik 14ra bitartean egingo den hautaketa-fasean.
Azkenik, Garapenerako Lankidetzaren Euskal Agentziaren, Gazteria Zuzendaritzaren, Gazteriaren Euskal Kontseiluaren eta GGKEen ordezkariek osatutako hautaketa-batzordeak 100 pertsona aukeratuko ditu, gehienez, Hegoaldeko herrialdeetako proiektuetara joateko.
Maiatzean prestakuntza-fasea egingo da, baita Barrian ere, maiatzaren 20an eta 21ean. Hautatutako pertsonak foru-aterpetxera joango dira asteburu horretan, prestakuntza jasotzeko, kontzientziatzeko eta esleitutako destinoa ezagutzeko.
Esperientziatik itzuli ondoren, urrian, ebaluazio-jardunaldiak egingo dira Barrian. Jardunaldi horietan, lankidetzan aritu diren gazteek beren esperientzia pertsonala partekatuko dute, bai eta pertsonalki izan duten eraginari buruzko balorazioa ere.
Gazteria Zuzendaritzak 425.000 euro bideratuko ditu, guztira, Euskadiko Gazteak Lankidetzan programa garatzeko. Partida hori hiru kontzeptutan banatzen da: proiektuak aurkezteko GGKEei emandako dirulaguntzak; Hegoaldeko herrialdeetara joateko txartelak, bisatuak eta aseguruak ordaintzea; eta hautaketa-, prestakuntza- eta ebaluazio-prozesuak egitea.
