Javier Hurtado Turismo, Merkataritza eta Kontsumo sailburuak agerraldia egin du Legebiltzarrean, Euskadiko zikloturismo-estrategiaren berri emateko. Sailburuak adierazi duenez, gure lurraldeak beharrezko faktore guztiak biltzen ditu produktu zikloturista sendo bat garatzeko: bizikleta-tradizio luzea, sarbide onak, azpiegitura onak, ostatu-ahalmen eta -barietatea, eskaintza askotarikoa, erakargarria eta kalitatezkoa, eta kirol-komunitate aktibo eta kohesionatua.
Turismo, Merkataritza eta Kontsumo Saila turismo iraunkorreko eredu bat bultzatzen ari da, bere eskaintzaren dibertsifikazioan oinarritua, askotarikoa eta alderdi anitzekoa. Hori da Euskadiko bisitariak erakartzeko motorretako bat, azterketek adierazten dutenez.
Ildo horretan, Turismo, Merkataritza eta Kontsumo Sailak zikloturismo-estrategia bat jarri du abian, Euskadi nazioarteko erreferente bihurtzeko, naturarekin kontzientziatuta eta errespetuz jokatzen duen turismo-segmentu bat erakartzeko, turismo-fluxuak lurraldean banatzeko, eta egonaldia eta desestazionalizazioa areagotzeko.
Euskadiko zikloturismo-estrategia lau ardatzetan oinarritzen da. Lehenik eta behin, zikloturismorako azpiegiturak garatzen lan egiten da, 180 km baino gehiagoko bide berdeak, 3 hiriburuetako ibilbideak, Erromanikoaren Ibilbidea, 2 BTT zentro, Arabako Lautadako Ibilbide Handia edo The Basque Route bezalako Ibilbide Handiak, Ignaziotar bidea edo Santiago bidea barne. Gainera, ibilbide berriak sortzeko lanean ari dira.
Bigarrenik, sektorearekin hertsiki lan egiten da bisitari zikloturistak Euskadin turismo-zerbitzu egokiak eta kalitatezkoak aurki ditzan. Turismo, Merkataritza eta Kontsumo Saila ostatu- eta zerbitzu-enpresentzako prestakuntza-tailerrak eskaintzen ari da, eta Euskadiko II. Zikloturismo Foroa egingo da maiatzaren 4an.
Hirugarren jarduera-ardatzak sustapenari eta merkaturatzeari egiten dio erreferentzia, prentsa espezializatuko bidaiekin eta udazkenean Meet Basque Country izango den turoperadoreen topagune handiarekin. Gainera, sustapena bultzatu da Espainiako Trenbideen Fundazioarekin sinatutako lankidetza-hitzarmenaren bidez, Euskadiko bide berdeak bultzatzeko.
Azkenik, estrategiaren laugarren ardatzak Komunitate zikloturista kohesionatua sortzeari egiten dio erreferentzia. Zaleak, enpresak eta sareko komunitateetako administrazioa elkartzea da helburua, zikloturismoa bultzatzeko esperientziak, ibilbideak eta lan komuna partekatzeko.
Laburbilduz, Javier Hurtado sailburuak azpimarratu du 2023 txirrindularitzaren eta zikloturismoaren urtea izango dela Euskadin. Frantziako Tourraren irteerak ikusgarritasun handia emango dio gure lurraldeari nazioartean, eta, alde horretatik, Turismo, Merkataritza eta Kontsumo Sailaren zikloturismo-estrategiak indartu egingo du Euskadi zikloturismoan nazioarteko erreferente bihurtzea eta iraunkortasuna sustatzea bere hiru alderdietan, ingurumenean, gizarte eta kulturan eta ekonomian; horrez gain, Euskadi marka indartzen lagunduko du.
