EITBk eta Kutxabankek, Eusko Jaurlaritzaren Euskadi Basque Country markaren babesarekin, ekimen berezi eta herrikoi bat prestatu dute Tour Grand Départ Pays Basqueren irteera historikoa dela eta: oroitzapenezko 60.000 ikurrin inguru banatzea herritarren artean datozen egunetan.
Ekintza ostegun honetan (ekainak 15) aurkeztu da Bilbon, Kutxabankeko Marketin eta Publizitate zuzendari Ines Monguilotek eta EITBko Sustapen eta Irudi buru Luis Manuel Martinek parte hartu duten ekitaldian.
Inés Monguilotek, Kutxabankeko Marketin eta Publizitate zuzendariak, kirol ekitaldiaren garrantzia azpimarratu du: «Ekimen honekin bat egin dugu Euskadirentzako mugarri historiko honetan erakundeei babesa emanez, tokiko zein nazioarteko mailan oihartzun handia duen ekitaldi honetan. Euskadi ez ezik, Kutxabank ere gure herrialdeko erreferentziazko finantza-erakunde gisa kokatu nahi dugu «.
«Ikurrina irudikatzen duen sinbolismo honen bidez, ongietorria eman nahi diegu hona hurbiltzen diren guztiei», adierazi du Monguilotek. «Parte hartu nahi dugu lasterketa eta milaka gonbidatuak Euskadira iristen direnean merezi duten harrera egiteko, bakarra eta errepikaezina den edizio honetan», gaineratu du. Monguilotek, halaber, «ikurrinak Tourra igarotzen den herri eta hirietako gure bulegoetan banatuz», oroimenezko ikurrina sustatzeko aliantzarekin duen lankidetza azaldu du.
Luis Manuel Martín EITBko Sustapen eta Irudi buruak adierazi duenez, abian jarritako ekimenaren helburua une historiko hau oroitzea eta herrialde hau eta mundu osoan duen zaletasun handia ikusaraztea da. «Tourra munduko txirrindularitza lasterketarik garrantzitsuena da, eta euskal zaleek inoiz baino grinatsuago animatuko dute lasterketa», adierazi du.
Oroitzapenezko ikurrinen banaketak pasio hau erakutsi nahi du: «Beste behin ere ikurrinez bete nahi ditugu kaleak, balkoiak eta errepideak. Emozio bihurtu den zaletasun hau mundu osora zabaltzea nahi dugu «, gaineratu du Luis Manuel Martinek.
Banaketa
Kutxabank gaur bertan hasiko da euskal herri eta hiri guztietako bulegoetan ikurrinak banatzen.
Halaber, EITBren eskutik, ekainaren 26an egun osoan zehar banatuko dira ikurrinak Gasteizen, Loma Jeneralaren kaleak eta Andre Maria Zuriaren plazak bat egiten duten tokian.
Asteartean, hilak 27, Amorebieta-Etxanoko herriko plaza izango da banaketa gunea eta hurrengo egunean, ekainak 28, asteazkena, Donostiako Alderdi Ederren, udaletxearen aurrean.
Hilaren 29an, Abando eta Bilboko Guggenheim izango dira berriz ere ikurrinak banatzeko gunea. Horrez gain, EITBk ikurrinak banatuko ditu ekainaren 29an, 30ean eta uztailaren 1ean Bilboko Areatzan dagoen Tourreko Fan Parken.
