Turismo, Merkataritza eta Kontsumoko sailburu Javier Hurtadok parte hartu du gaur Euskadiko Turismoaren Kode Etikoan sartu diren 102 enpresa berriei ziurtagiriak emateko ekitaldian. Horiekin, dagoeneko 621 enpresa atxiki eta aintzatetsi dira ekitaldi honetan; izan ere, “zuen gain hartu dituzue erantzukizun soziala eta jasangarritasuna eguneroko jardunean” adierazi du sailburuak.
Aintzatespen-ekitaldi hori, bigarren aldiz, Euskadiko Turismoaren Kode Etikoaren esparruan egiten da. Kode hori Turismo, Merkataritza eta Kontsumo Sailak aldarrikatu zuen, Basquetourren bidez, 2019an, eta Euskal Turismoaren Etika Batzordea eratu zen 2022an. Batzorde horren urteko bigarren bilera otsailaren 27an egin zen.
Sailburuak gogorarazi du Euskadik konpromiso eta aktibo handiena duen autonomia-erkidegoen artean jarraitzen duela kalitate eta lehiakortasun turistikoaren ziurtagirietan, hainbat programarekin, besteak beste kalitatearen Q-a, jardunbide egokiak, ekoetiketa edo eraginkortasun energetikoa. “Lan hori guztia apustu partekatu baten emaitza da: jasangarritasun turistikoaren aldeko apustua. Turismo jasangarriaz ari garenean benetan esan nahi dugu, ingurumenean eta tokiko kulturan ahalik eta inpaktu txikiena sortuta, bere jarduera garatzen duen turismoa dela. Eta batez ere, komunitatean eragina duten onurak dituen turismoa. Erantzukizun eta jasangarritasun turistikoak, beraz, 3 alderdi hauek hartu behar ditu beti bere baitan. Ingurumenarena, soziokulturala eta ekonomikoa”.
Ildo horretan, sailburuak nabarmendu nahi izan duenez, “Euskadin etengabe egiten dugu lan jasangarritasun turistikoaren alde, erakundeetatik eta sektoretik. 2022an turismoa suspertzen gidatu dugu, pandemia gogor baten ondoren, eta 2023an modu iraunkor eta jasangarrian hazten jarraitzen dugu, lehen 5 hilabeteetan % 19ko hazkundearekin. Beraz, hazkunde desestazionalizatzailea da, eta ziurgabetasun une batean dator, turismoa euskal ekonomiaren bultzada bihurtzen den unean. Turismoaren datu onek ekonomia dinamizatzen laguntzen dute; izan ere, Euskadiko biztanleriaren % 10i zuzenean lana ematen dion turismoaren industriaz ari gara; 100.000 familia baino gehiagori eta BPGren 6,4ri. Horrela, gaur turismoak trakzio-elementu gisa, kohesio-elementu gisa eta ekonomiari eta jasangarritasunari bultzada emateko elementu gisa duen balioa aldarrikatzen dugu”.
