Gobernu Kontseiluak gaur onartu du BBK Fundazioari 294.000 euroko zuzeneko dirulaguntza ematea, langabetuak gaitasun digital aurreratuetan trebatzeko prestakuntza-proiektu bat garatzeko. Bootcamp metodologia erabiliko da, eta prestakuntza praktika profesionalera eta berehalako enplegagarritasunera bideratuta dago.
Idoia Mendia Lehendakariorde eta Lan eta Enplegu sailburuak proposatuta, Lanbide-Euskal Enplegu Zerbitzuaren laguntza Euskadin proposamen eta metodologia bakarra duen BBK Bootcamps 2023 proiektu pilotua abian jartzeko da, eta aldez aurretik ez da garatu parte-hartzaileentzako doako prestakuntza-ibilbideen ekimen hau.
Bootcamp metodologiak, murgiltzearen eta intentsitatearen bidez, eduki digitala ahalik eta denbora laburrenean lantzea bilatzen du. Esperientziak sortzean oinarritzen da, parte-hartzaileek hainbat egoeratan arazoak konpontzeko baliabide teknikoak mobilizatzeko gaitasuna izan dezaten, garapen teknologikoko enpresetan egunero gertatzen diren benetako egoerak konpontzen lan eginez.
Kasu honetan, 470 orduko bi prestakuntza-programa emango dira, zibersegurtasuneko eta datuen kudeaketako pertsonen kualifikaziora bideratuak, teknologia- eta telekomunikazio-sektoreko enpresetan azkar sartzeko, eta gaitasun nahikoak emango zaizkie okupazio horietan hasiera-hasieratik lan egiteko.
Prestakuntza-prozesua gure inguruko enpresen behar espezifikoen arabera bideratu da, eta, beraz, parte-hartzaileek eskuratuko dituzten gaitasunak zeregin zehatzak garatzera bideratuta daude. Horren ondorioz, merkatuan enplegagarritasun-tasarik altuena duen sektore honetako kualifikazio handiko langileen gabeziak estali nahi dira. Prestakuntza amaitzen duten pertsonak, gainera, kontratazio-premiak dituzten enpresekin harremanetan jarriko dira.
