Luis Vega González, UPV/EHUko Matematika saileko katedraduna eta Matematika Aplikatuko Euskal Zentroko (BCAM) Severo Ochoa akreditazioaren ikertzaile nagusia, RSME 2023ko domina eskuratu du. Bereizketa horren bidez, gizarte zientifikoak Espainiako komunitate matematikoaren aintzatespen publikoa adierazi die «matematika-esparruetan, hala nola hezkuntzan, ikerketan, transferentzian eta dibulgazioan, egindako ekarpen garrantzitsu eta etengabeengatik» nabarmendu diren pertsonei.
Vega katedradunarentzat RSME domina jasotzea «ohore handia da domina ematen duen erakundeagatik» eta ikaskideen aintzatespena izateagatik. «Iniziatiba arrotz bat izan da, eta sorpresa atsegina izan da», azaldu du. Izan ere, epaimahaiaren proposamena aho batez adostu zen, eta presidenteak adierazi zuen Vega Gonzálezek RSMEri egindako ekarpena «funtsezkoa» izan dela eta «indartzen» lagundu duela. Bere ikerketa-ibilbideari eta lorpen profesionalei dagokienez, katedraduna harro dago bere ibilbideaz. «Lankide askorekin eta nire familiarekin partekatutako bidaia zoragarria izan da, eta da oraindik ere», esan du.
«Une onean gaude ikerketarako, eta hainbat belaunaldik izan dute eragina nazioartean. Asko dago finkatzeke eta lanarekin bakarrik lortzen da, beti ere ikerketa mugatik ahal bezain gertu egonda «, adierazi du Vega Gonzálezek.
Ibilbide luzea
Luis Vega Gonzalez (Madril, 1960) Analisi Matematikoko katedraduna da gaur egun UPV/EHUn. 1982an matematikatan lizentziatu zen Complutense Unibertsitatean, eta 1988an doktoretza lortu zuen Madrilgo Unibertsitate Autonomoan (UAM). Chicagoko Unibertsitatean bi urte eman ondoren UAMera itzuli zen, eta 1993az geroztik dago Euskal Herriko Unibertsitatean, non 1995etik den katedradun.
Egun, BCAMeko (Basque Center for Applied Mathematics) Severo Ochoa akreditazioaren ikertzaile nagusia da Luis Vega. Mundu guztian da ezaguna deribatu partzialen ekuazioei buruzko lanengatik, baita Fourier-en analisien ingurukoengatik ere. Halaber, 2012ko Euskadi Ikerketa Saria ere bada, eta 2015ean EURASC-European Academy of Sciences akademiak ematen duen Blaise Pascal domina jaso zuen. Sari honek aitortu egiten du zientziari eta teknologiari egindako ekarpen pertsonal bikaina, eta ikerketaren eta hezkuntzaren bikaintasuna sustatu izana.
Bere ibilbide luzean, Vegak hainbat aldiz jaso du bere ikerketa-lanagatik saria: 2012an Euskadi Ikerketa saria eta American Mathematical Society (Inagural Class) elkartearen fellow saria jaso zituen, eta 2015ean Blaise Pascal domina matematikan.
Gainera, Europako Ikerketa Kontseiluak finantzatutako HADE (Harmonic Analysis and Diferential Equations: New challenges) proiektuaren buru da.
