- Web orri honen bidez lankidetza sare bat sortuko da eta herritarren partaidetzako berrikuntza laborategi honetan parte hartuko duten rol eta esperimentu ezberdinak definituko dira
iLab, Gobernantza Publiko eta Autogobernu Sailak bultzatua, bere web orria argitaratuz ematen ditu lehen urratsak. Orri honen bidez, Eusko Jaurlaritzaren partaidetzan berrikuntzari laguntzeko sarea osatzeko interesa duten eragileak erakarri nahi ditu. Sare hori hiru zerbitzutan (prospekzioa, esperimentazioa eta transferentzia) eta hiru mailatan (agente eragileak, agente aktiboak eta agente latenteak) egituratuko da.
Partaidetzaren arloko Euskadiko lehen berrikuntza-laborategi honen bidez, irtenbide zehatz eta egonkorrak ikertu, entseatu eta eraikiko dira elkarlanean. Metodologian, prospekzioaren bidez, gorabidean dauden joerak identifikatuko dira eta problematika espezifikoetan sakonduko da; esperimentazioa pilotu eta prototipo jakin batzuk garatzera bideratuko da, eta transferentzia partaidetzako berrikuntza-prozesuak garatzeko laguntzera zuzenduko da, entzutetik eta prospekzioaren eta esperimentazioaren emaitzen ebaluaziotik eta sistematizaziotik abiatuta.
Horrela, gaurtik aurrera, berrikuntzan interesa duten eragileek eta pertsonek, balio publikoaren sortzaile gisa, sare horretan parte hartzeko aukera izango dute, baita parte hartzeko proiektuak edo prototipoak aurkeztekoa ere. Lankidetza hau hiru modutan ezar daiteke:
- Agente eragilea. Eusko Jaurlaritza, Arabako, Bizkaiko eta Gipuzkoako Foru Aldundiak, Vitoria-Gasteizko, Bilboko eta Donostiako Udalak eta Innobasque osatzen duten talde honetan parte hartu du, non eragile zibikoak eta adituak gehitu zaizkie. Horiek guztiek parte hartuko dute erabaki estrategikoak hartzen, hala nola iLaben etorkizuneko ikuspegia, sarearen iraunkortasuna eta agenda partekatua;
- Agente aktibo. Parte hartuko dute berrikuntza sustatzen dutenek eta komunitatearekin ezagutzak eta esperientziak trukatzen dituztenek. Eragile aktiboek gauzatuko diren proiektuetan erabakiak hartzeko guneetan parte hartuko dute;
- Agente latentea. Ikaskuntzako edo entzute aktiboko posizioa dutenek lagunduko dute.
Nortasun propioa duen eta konfigurazio juridikorik behar ez duen edozein erakundek, entitatek edo pertsona-taldek hartu ahal izango du parte eragile gisa.
iLab Gobernu Irekirako Aliantzaren (OGP Euskadi) konpromisotik sortutako proiektua da, eta Euskadiko Zientzia, Teknologia eta Berrikuntzako Planaren barruan kokatzen da. Plan horrek berrikuntza publikoa bultzatzen du, Administrazio irekiagoa, gardenagoa, berrituagoa eta digitalagoa sortzeko helburuarekin, zerbitzuen eraldaketari ekiteko eta gobernantza demokratikoa eta herritarren parte-hartzea hobetzeko.
AURRETIKO ESPERIENTZIAK
Proba gisa, iLab martxan jarri aurretik proiektu pilotu desberdinak garatu dira, eredua berresteko. Adibide gisa, Bilboko Udalak, Errekaldeberri auzoaren etorkizunerako udal-estrategiaren barruan, prozesu parte-hartzaile bat bultzatu zuen Errekalden migratutako pertsonen parte-hartzea areagotzeko, eta Getxoko Udalak, Thinking Fadura kasuarekin, prozesu ireki bat egin zuen Fadurako kiroldegia diseinutik abiatuta kirol-parke publiko bihurtzeko.
Bestalde, Eusko Jaurlaritzako Osasun Sailak, Gobernantza Publiko eta Autogobernu Sailarekin eta hainbat udal eta elkarterekin batera, azterlan bat egin zuen, eta horren bidez egiaztatu zen partaidetza-prozesuek potentziala dutela komunitateen osasuna eta ongizatea handitzeko. Azkenik, Gipuzkoako Foru Aldundiak aurrekontu parte-hartzaileen prozesuetan jarri zuen arreta, herritarrek aurrekontu publikoaren prestaketan, jarraipenean eta kontrolean parte har dezaten.
