- “Enplegua, aberastasuna eta ongizatea sortzen dituen jarduera da, eta gure herrialdeko landa-eremuetako ezinbesteko pieza”- esan du
- Iñigo Urkullu Arabako UDAPA kooperatibaren instalazio robotizatu berrian izan da, horrek patatak ekoizten eta merkaturatzen ditu
Lehendakariak ziurtatu du Euskadiko historia ezin dela ulertu nekazaritzarik gabe, eta jarduera hori prestigiatu eta pertsona gazteak jarduerara erakartzearen alde egin du. Iñigo Urkulluk, Arantxa Tapia sailburuarekin batera, patatak ekoizten eta merkaturatzen dituen Arabako UDAPA kooperatibak Jundizko industrialdean dituen instalazio berriak bisitatu ditu. Bertan, planta robotizatu berria ezagutzeko aukera izan du.
Bere hitzaldian EAEko nekazaritzako elikagaien sektorea defendatu du, eta adierazi duenez, «aktibo dago eta ingurumen-kontzientzia duten teknologia berritzaileen bilaketa aktiboko prozesu batean dago, laboreen produktibitatea handitzearekin batera elikagaien ekoizpen-prozesuaren aztarna murriztu ahal izateko».
Era berean, balioa eman dio Euskadiko zentro teknologikoek eta enpresa txiki eta ertainek duten lankidetza estuari, eta adibide gisa Udapa aipatu du, NEIKER zentro teknologiko publikoarekin batera, “aurrerapausoak ematen ari baita doitasunezko nekazaritzan”.
Hala, Arabako kooperatiba honen ikuspegia nabarmendu du, bat baitator Europar Batasunaren «Baserritik mahairako estrategia»-ren helburuekin, elikadura-sistemak bidezkoak, osasungarriak eta ingurumenarekiko errespetuzkoak izan daitezen.
«Nekazaritza-sektorearen jarduera funtsezkoa da Euskadirentzat. Horrela izaten jarraitu behar du etorkizunean ere. Enplegua, aberastasuna eta ongizatea sortzen dituen jarduera da, eta gure herrialdeko landa-eremuetako ezinbesteko pieza da «, esan du amaitzeko.
