Oscar de Marcos komunikabideen aurrean agertu da lehoiek larunbat honetan 2023/24 denboraldiari hasiera emateko Real Madriden aurka jokatuko duten neurketaren atarian. Laguardiako jokalaria Athleticen bostehun partida betetzeko atarian dago, eta oso harro eta pozik dago horregatik: «Uste dut futbolaren munduan gaudenean askotan ez garela jabetzen zertan ari garen eta ez garela pentsatzen gelditzen. 500 partida asko dira, batez ere, iritsi nintzenean zenbaki horretara heltzea lortu zutenak oraindik ere idoloak eta erreferenteak direlako niretzat. Orain haiengandik hurbil nago eta ilusio berezia egiten dit. Zorionekoa sentitzen naiz«.
34 urterekin, 18 zenbakidun zuri-gorriak bere hamabosgarren denboraldiari ekingo dio: «Beste urte batez, ez nuen argi jarraituko nuen ala ez. Erabakia oso argi eduki nahi nuen. Urtetik urtera gero eta gehiago kostatzen zaidala une egokia aurkitu behar dudalako. Egia da joan den denboraldia harrigarria izan zela niretzat. Oso ondo egon nintzen urte osoan, eta horrek lagundu egin zidan erabakia hartzen. Kolektiboari lehentasuna ematen diot arlo pertsonalari baino, eta taldeari laguntzen saiatuko naiz, orain arte bezala«.
Ikasturte berria hasiko da eta talde zuriak San Mamesera egindako bisitarekin egingo. De Marcosek uste du aurkari zaila dutela aurrean LaLiga honetan estreinatzeko, baina baikorra da: «Taldea une onean dago eta azken neurketetako erritmoa ona izan da. Uste dut dinamika onean gaudela liga hasierari aurre egiteko, eta pentsamolde horrekin joan behar dugu. Eurek ere partida zailak izan dituzte. Agian ez dituzte denboraldiaurrean espero zituzten emaitzak atera, baina lehiaketa guztiz ezberdina da, dena aldatzen baita orduan. Real Madrid oso talde fidagarria da, eta urte asko daramatza tituluak irabazten edo lortzeko borrokan. Ondo indartu da, baina egia da jokalari garrantzitsuren bat galdu duela ere. Arerio zaila izango da, baina San Mamesen jokatzea beti da ilusionagarria guztiontzat. Norgehiagoka on bat egiteko gogoa dugu«.
